Giaprobahan na sa Sangguniang Panlungsod ang Resolution No. 2023-0274, mao ang Memorandum of Agreement tali sa City Government of Malaybalay (CGM) ug sa Bukidnon State University mahitungod sa Persons with Disabilities Empowered for Employment and Entrepreneurship (PWDEE).

Kaniadtong February 23, 2023, ang atong City Mayor Jay Warren R. Pabillaran nag endorso ngadto sa SP uban sa paghangyo nga siya pagatugutan sa pagsulod sa usa ka MOA tali sa CGM ug BSU mahitungod sa nasangpit nga proyekto.

Nasayran nga ang Hospitality Management Department sa Bukidnon State University nagmugna ug community-based training program diin maglambigit kini sa PWD dinhi sa dakbayan ug andam usab ang CGM sa pakigtimbayayong ug pagtabang sa maong programa.

Ang tumong ug tinguha sa maong proyekto nga matudluan ug mapalambo ang abilidad sa PWDs ug mahatagan usab sila sa kahigayonan sa pagnegosyo ug pagpanarbaho.

Human sa masusing pagtuon atol sa ika 34th regular session niadtong March 14, 2023, giduso sa Chairman sa Committee on Education Zoltan Dindo D. Dinlayan ug hiniusang giuyunan sa konseho nga pagatugutan ang halangdong Mayor Pabillaran sa pagsulod sa usa ka MOA tali sa CGM ug sa Bukidnon State University mahitungod sa nasangpit nga proyekto.

Tungod niini, mahatagan sa pagtagad ug mas mapalambo ang panginabuhian sa atong mga igsoon nga PWDs dinhi sa dakbayan .

SP-NADA