Giaprobahan na sa Sangguniang Panlungsod (SP) ang Resolution No. 2022-0154, mao ang pag endorso sa proyekto nga rehabilitasyon sa Malaybalay City Diversion road ngadto sa Department of Budget and Management (DBM) pinaagi kang DBM Secretary Amenah F. Pangandaman para maapil sa fiscal year 2022 Local Government Support Fund-Financial Assistance to Local Government Unit (LGSF-FALGU).
Hibaluan nga ang nasangpit nga proyekto isa sa mga priority development projects nga natala sa Annual Investment Plan (AIP) ug Local Development Investment Program (LDIP) apan ang syudad walay igong pundo aron mapatuman ang maong proyekto.
Kaniadtong Oktubre 10, 2022, giindorso ni Mayor Jay Warren R. Pabillaran ang sulat gikan sa DILG Regional Director Mr. Arnel M. Agabe, CESO III mahitungod sa mga dokumento nga kinahanglan alang sa maong katuyoan usa niini ang resolution gikan sa SP.
Nasayran usab nga ang maong proyekto mukabat sa kapin kon kulang sa kantidad nga 15 million pesos ug ang pundo magagikan kini sa LGSF-FALGU.
Ang maong resolusyon giduso ni Konsehal Erwin A. Damasco, myembro sa Committee on Engineering & Public Works ug hiniusang gi-uyonan usab sa konseho niadtong Nobyembre 8, 2022 atol sa ilang ika-17 nga regular session.
Tungod niini, mahatagan ug katumanan ang maong proyekto ug mas mapadali ang pagsulod ug pagawas sa mga produktong pang agrikultura sa syudad sa Malaybalay.
Report: SP-NADA
