Si Ariel C. Padojinog sa Barangay Sto. Niño, ning syudad nahimong Regional 4H Debate Champion atol sa napahigayon nga Regional 4H Youth Camp didto sa Alomah’s Place, Dahilayan, Manolo Fortich Bukidnon niadtong Hulyo 26-28, 2022.

Tumong nianing tinuig nga panagtapok ang pagpalambo sa mga kabatan-onan pinaagi sa pagpausbaw sa ilang kahibalo ug kahanas sa produksyon sa agrikultura. Gihatagan usab og importansya ang pagpalambo sa ilang pagkapangulo ug artistikong abilidad, pagpaambit sa mga kasinatian ug pagkat-on pinaagi sa usa ka indigay. Ingon man, ang kalihokan naglambigit sa unsaon mamahimong epektibo ang pagdumala og grupo.

Pipila sa mga sangka nga gisalmotan sa ubang mga munisipyo uban sa grupo sa probinsiya sa Bukidnon mao ang Promotional Video Making Contest, Innovative Technology on Organic Fertilizer Production, Lakan at Lakambini ng 4H Club 2022, Indigenous Chandelier Making Contest, ug Canvass Painting diin midaog si Mr. Clear Balaba gikan sa Valencia City.

Si Mr. Padojinog ug Mr. Balaba maoy magrepresentar sa Bukidnon sa umaabot nga National 4H Youth Camp.

Espesyal nga gipasalamatan sa Malaybalay City Agriculture Office ang Agricultural Training Institute alang sa pagpahigayon niini nga kalihokan, ug sa Provincial Agriculture Office sa pagtabang sa mga kabatan-onan.

By: Gecel Q. Ocon, CAgO-NADA