Gipahigayon ang “Ritual and Groundbreaking Ceremony sa “Daraghuyan Tribal Village” Daraghuyan ancestral domain sa Barangay Dalwangan, Malaybalay City niadtong Agosto 25, 2022 kung diin si Bae Inatlawan Adelina D. Tarino, ang ilang tribal leader, ang nagdumala sa seremonyas ug ritwal.

Gitambongan ni City Mayor Jay Warren R. Pabillaran ang maong kalihukan, ug giduyogan siya nila ni Engr. Madeleine Gilda Abellera- District NHA Manager, Ms. Easterluna Canoy- Executive Director KIN ug ni City Administrator Atty. Anna Marie R. Bergado. Mitambong usab sila si Honolu Marie Cruzin sa Tourism office, Engr. Adrian Gamboa sa CPDO, Engr. Leo Rustan dela Cerna-OIC-CEO, ug Alan J. Comiso & Kenneth Taylor sa CDRRMO. Gikan sa barangay, mitambong si Punong Barangay Raul B. Pandong ug mga kagawad, ingon man mga perosnahe sa DEVREX Construction Firm.

Ang maong proyekto nagkantidad ug 20 milyon pesos nga naggikan sa National Housing Authority (NHA) kon diin ang kinatibuk-an nga proyekto makahimo ug 80 ka balay nga gi-desenyo sa komunidad sa Daraghuyan subay sa ilang kultura.

Ang local nga pangagamhanan sa Malaybalay midugang usab sa pundo nga nagkantidad ug 17 milyon aron kini magmalampuson ug mapadayon ang tumong ug tinguha nga mahatagan ug libreng pabahay ang mga lumad sa maong dapit.

Dako ang kalipay ug pasalamat ni Bae Inatlawan sa maong proyekto kay tungod niini masugdan na gayud ang pagbuhat sa mga balay nga dugay na nilang gihamdom.

Matud pa sa mensahe ni Mayor Pabillaran, nga giplano kini aron maka baton ang atong mga igsoon nga Lumad sa Daraghuyan sa desente nga balay nga mahimo nga molantud pa sa sunod nila nga mga kaliwat. Kini usab nga proyekto espesyal sa Daraghuyan tungod kay sila maoy naga-bantay og nagprotekta sa atong kina-iyahan sulod Mt. Kitanglad National Range Park (MKNRP).

Mipahimangno usab ang Devrex Contractor nga ug aduna man galing muabot nga problema ug babag kabahin sa proyekto kini pagasulbaron ug andam sila muhatag sa iyang panahon.

Si City Administrator Atty. Anna Marie R. Bergado nagkanayon usab nga tinguha sa maong proyekto nga magpabilin, mapreserbar ang atong Kinaiyahan, mapadayon ang kultura, ug ang lumadnon nga kalihokan alang sa atong mga umaabot nga henerasyon. Ug mamahimo kini “tourist attraction”sa umaabot nga panahon sa Syudad sa Malaybalay.

Report: CUDHO-NADA