Ang lokal nga pangagamhanan sa Malaybalay naglunsad og “Search for Best Barangay Disaster Risk Reduction and Management Committee (BDRRMC),” niadtong Hulyo 15, 2022 diha sa CEEDMO Function Hall sa City Public Market ning syudad.

Ang maong kumpetisyon sa 46 ka barangay gipasiugda sa City Disaster Risk Reduction and Management Office (CDRRMO). Gipresentar sa maong buhatan ang criteria sa kalihokan aron mas masabtan ug mahibawan sa mga opisyales ug lumilihok gikan sa tanan barangay ang kamahinungdanon niini. “Kini magsilbi nga giya nga maghatag kanato og kapasidad diha sa atong kabarangayan kung unsa kita ka andam sa pagresponde sa panahon sa disaster,” matud pa ni Alan J. Comiso, ang acting nga hepe sa maong buhatan.

Giduso sa atong pang-gobyerno ang pro-active approach sa atong mga lakang, plano, proyekto ug palisiya sa DRRM. Tumong sa maong kalihokan usab nga masugdan ug mapatuman ang mekanismo diha sa kabarangayan nga gisuportuhan ni Mayor Jay Warren R. Pabillaran.

Gilantaw sa maong programa kauban ang representante gikan sa upat ka thematic area nga masuta ug masukod ang kapasidad sa matag barangay sa ilang pagdumala sa disaster pinasubay sa RA 10121 kon Philippine Disaster Risk Reduction and Management Act of 2010.

Report: CDRRMO-NADA