Gi-aprobahan sa Sangguniang Panlungsod ang Resolution No. 2023-0510 nga nag hangyo sa 46 ka barangay sa dakbayan sa Malaybalay sa pag panglimpyo matag sabado. Kini human giduso ni Hon. Councilor Kathleen Cecille C. Pagaling, Chairman sa Committee on Health and Social Services.

Ang maong resolusyon nga naghangyo sa pagpanglimpyo sa 46 ka barangay matag sabado gihimo aron makontrola ang pagkaylap sa Dengue Vector Mosquitoes sa dakbayan.

Kini basi usab sa RA 7160 nga mao ang Local Government Code of 1991 nga nagmando sa matag local government sa pagprotekta sa panglawas ug pagsiguro sa kaluwasan sa matag lumupyo niini, pinaagi sa paghimo ug mga lakang sa pag pakgang ug kontrola sa pagkaylap sa bisan unsang matang sa sakit ingon man pag-abag sa mga naapektuhan.

Kahibaloan usab nga ang dengue usa ka major public health concern ug posibleng makamatay nga sakit ug mahimong problema sa komunidad kay dali ra kini mokaylap.
Ug aron mapugngan ang pagkaylap niini, gipanghingusgan sa dakbayan sa Malaybalay ang kampanyang anti-dengue pinaagi sa pagpanglimpyo sa palibot niini.

Ug human sa masusing pagtuon, atol sa ika 64 th nga regular session niadtong Oktubre 10, 2023, hiniusang giuyunan sa konseho nga hangyoon ang kabarangayan sa Malaybalay sa pag gahin sa adlawng sabado sa pag panglimpyo sa palibot kontra dengue aron malikayan ang pagkaylap niini ug nga kini mamahimo na unya nga regular nga kalihukan sa lokal nga pangagamhanan.

Report: SP-NADA