Malampuson nga gilusad sa Panggamhanang Lokal sa Syudad sa Malaybalay ang Abaca Production isip kabahin sa Sustainable Land Management Program niadtong Oktubre 8 ug 9, 2024, sa mga barangay sa Manalog, Kibalabag, Can-ayan, ug Dalwangan.

Uban sa hugot nga suporta ni Mayor Jay Warren Pabillaran, gipangunahan ang maong kalihukan sa City Environment and Natural Resources Office (City ENRO) nga nagatumong sa pagpahiuli sa mga nagkadaot nga kayutaan sa kabukiran pinaagi sa pagtanom ug abaca, diin target niini ang usa ka gatos ka ektarya.

Mikabat sa usa ka gatos ka mga benepisyaryo gikan sa mga Barangay sa Manalog, Kibalabag, Can-ayan, Dalwangan, Imbayao, Kalasungay, ug Mapayag ang nakadawat sa programa. Ang matag benepisyaryo nakadawat ug 250 ka abaca suckers ug tunga sa kilo nga abono para sa pagtanom niini.

Gi-awhag ni Mayor Pabillaran sa iyang pakigpulong nga atimanon ug palambuon kini nga mga pananom aron makatabang sa pag-uswag sa ilang panginabuhian ug makahatag ug inadlaw nga kita panahon nga mudako kini sulod sa duha ka tuig.

Samtang, si City ENR Officer Jessie Suson nagpasabot sa importansya sa programa nga naghatag dili lang dugang panginabuhian sa mga mag-uuma, apan nakatabang usab sa kalasangan ug kinaiyahan pinaagi sa paglikay sa pagkabanlas sa yuta ug pagpahiuli sa katabunok niini.

Si Ms. Joan Marie A. Diola, Agriculturist II gikan sa City Agriculture Office, naghatag usab ug orientation sa mga benepisyaryo kabahin sa maayong pagdumala sa abaca.

Ang kalihukan gitapos sa pagpang-apod-apod sa abaca seedlings ug abono, nga gitambungan usab sa mga opisyales sa barangay ug sa lokal nga panggamhanan sa Malaybalay.

Report: City ENRO – Nada