Giaprubahan na sa Sangguniang Panlungsod ang SP Resolution No. 2023-0268 mao ang Memorandum of Understanding(MOU) tali sa City Government of Malaybalay (CGM) ug sa Department of Social Welfare and Development (DSWD) mahitungod sa supplementary feeding program alang sa mga bata nga anaa sa child development centers.

Kaniadtong Pebrero 23, 2023, ang atong City Mayor Jay Warren R. Pabillaran nag endorso ngadto sa SP uban sa paghangyo nga siya pagatugutan sa pagsulod sa usa ka MOU tali sa CGM ug sa DSWD mahitungod sa nasangpit nga programa.

Pinasubay sa mandato sa Republic Act No. 11037, gitahasan ang DSWD nga makipagtimbayayong sa lokal nga pangagamhanan alang sa pag implementar niini.

Nasayran usab nga sulod sa maong tahas, pagatutukan ug hatagan ug masustansyang pagkaon ang mga bata nga undernourished sa dili moubos sa 120 ka adlaw.

Nauyunan usab ang uban pang mga temino ug kundisyon nga natala sa nasangpit nga MOU.

Human sa masusing pagtuon, atol sa ika 33rd regular session niadtong March 7, 2023, giduso sa Chairman sa Committee on Health & Social Services Kathleen Cecile C. Pagaling ug hiniusang giuyunan sa konseho nga pagatugutan ang halangdong Mayor Pabillaran sa pagsulod sa usa ka MOU tali sa CGM ug DSWD mahitungod sa nasangpit nga supplementary feeding program.

Tungod niini, mas mahatagan ug pagtagad ang mga bata nga anaa sa Child Development Center labi na kadtong mga bata nga kulang sa sustansiya .

SP-NADA