Sa gipahigayon nga 107th regular session kagahapong adlawa September 3, 2024 didto sa SP Session Hall, Old Cityhall building, Malaybalay City, nga gitambongan sa mga opisyales ug mga kawani sa lokal nga pangagamhanan sa Malaybalay, gidawat ni Mr. & Mrs. Ronald Vidal ang pasidungog alang sa ilang anak nga si Ms. Robin Ayn Tagadan Vidal.

Kaniadtong Hunyo 11, 2024, atol sa ika 95th Regular Session, giduso ni Councilor Brian Nelson T. Flores nga hatagan sa Recognition ug Commendation si Robin Ayn Tagadan Vidal isip nahimong Top 9 sa gipahigayon nga December 2023 Occupational Therapists Licensure exam.

Si Ms. Vidal nagpuyo sa Barangay Uno ug garbo sa Malaybalay City ang iyang nakab-ot nga kalampusan. Gipakita niya ang pagkamalahutayon, dedikasyon, disiplina, kalig-on ug pagpaningkamot nga makab-ot ang iyang gipili nga propesyon.

Gipasidunggan usab sa konseho ang ginikanan ni Ms. Vidal sa ilang sakripisyo ug bililhon nga kontribusyon sa pag umol sa ilang anak aron mag excel sa iyang propesyon.

Ang katawhan sa Malaybalay mapasigarbuhon ug miduyog sa pamilya sa pagsaulog sa talagsaong kalampusan ni Ms. Vidal, uban sa mainiton nga paglaum ug pag ampo nga siya magmalahutayon inubanan sa disiplina ug walay paglubad nga pagtuo sa Dios.

Ang kalampusan ni Ms. Vidal magsilbi nga sumbanan, maayong ehemplo ug inspirasyon sa mga kabatan-onan ug sa umaabot pa nga generasyon. Angay lamang ang pasidungog nga gihatag kaniya.

Report: SP-NADA