Atol sa ika-94 nga regular session sa 9th Sangguniang Panlungsod kaniadtong Hunyo 4, 2024, giaprobahan ang Ordinance No. 1040, Series of 2024. Kini ang pag-amendar sa Ordinance No. 962, Series of 2020, nga naglambigit sa Solid Waste Integrated Management.

Ang Clean-As-You-Go Ordinance, nga giduso ni Konsehal Alan Ryann O. Legaspi, nagpalawom sa implementasyon sa Anti-Littering nga balaud. Sumala sa report, namatikdan nga nagkalat ang basura sa mga kadalanan, plaza, ug parke, ilabi na kon adunay mga programa ug aktibidadis.

Nasayran nga nahimong kinaiya sa katawhan ang pagbilin o paglabay bisan asa sa ilang basura sama sa panit sa kendi, junk foods, ug uban pang mga cellophane. Ang maong ordinansa gimugna aron mahingusgan ang pagpatuman sa balaud ug mamintinar ang kalimpyo ug kahapsay sa palibot, labi na sa pampublikong mga lugar.

Gitumong usab ang ordinansa aron ma-edukar ang katawhan ug matudluan ang kabataan sa pagdisiplina sa kaugalingon. Gipahinungod nga dili maglabay o magkalat sa mga basura sama sa mga putos sa kendi, upos sa sigarilyo, tissue paper, panit sa prutas ug utanon, ug putos sa mga pagkaon sa mga pribado ug pampublikong lugar sama sa eskwelahan, parke, dalan, kanal, ug mga agianan sa tubig.

Bawal usab ang paglabay sa mga basura gikan sa panimalay o komersyal nga establisemento sa mga basurahan nga gi-plastar sa pampublikong lugar sama sa plaza, parke, ug playground. Bawal usab sa mga drayber o pasahero nga maglabay ug basura sa kadalanan ug agianan sa tubig.

Ang mga silot sa paglapas sa ordinansa mao ang mosunod: unang paglapas, P500.00 o usa ka adlaw nga serbisyo sa komunidad; ikaduhang paglapas, P1,500.00 o tulo ka adlaw nga serbisyo sa komunidad ug pagkansela sa lisensya sa pag-operate sa mga business establishment; ikatulong paglapas, P2,500.00 o lima ka adlaw nga serbisyo sa komunidad ug pagkansela sa lisensya sa pag-operate sa establisemento.

Dugang pa, kung napamatud-an sa korte nga nakalapas, adunay P3,000.00 nga multa o pagkabilanggo sulod sa 30 ka adlaw, o parehong multa ug pagkabilanggo alang sa mga naglabay ug solidong basura sa mga sapa, creeks, kanal, agianan sa tubig, ug bakanteng lote.

Human sa masusing pagtuon, hiniusang giuyunan ug giaprobahan kini sa konseho ni Mayor Jay Warren R. Pabillaran kaniadtong Hulyo 9, 2024.

Tungod niini, mahatagan ug hugot nga implementasyon ang kalimpyo ug kahapsay sa palibot, labi na sa pampublikong mga lugar.

Report: SP-NADA