Ang lokal nga pangagamhanan sa Malaybalay pinaagi sa Public Employment Service Office (PESO), kauban ang Department of Labor and Employment (DOLE), nagdumala sa pag apud-apod sa sweldo alang sa programa nga Tulong Panghanapbuhay sa Ating Disadvantaged/Displaced Workers (TUPAD) niadtong August 6, 2024 didto sa Barangay 6 Covered Court, Malaybalay City.

Kini nga inisyatibo naghatag og kahigayunan sa trabaho alang sa mga disadvantage ug displaced workers o mga naapektuhan sa kalamidad, nagpalambo sa serbisyo sa komunidad sa mga barangay, ug nagsuporta sa ekonomikong kahimtang sa mga kabus nga residente.

Adunay 300 ka mga benepisyaryo, nga gipang apud-apod sa 46 ka barangays, nga nakaangkon og temporaryong trabaho gikan Hunyo 3 hangtod Hunyo 14, 2024 diin sila nag serbisyo sa ilang tagsa-tagsa ka mga barangay sulod sa 10 ka adlaw.

Kini nga programa, nga gipondohan sa DOLE, naghatag og P4,280.00 matag benepisyayro alang sa ilang trabaho, nga adunay P428.00 kada adlaw. Ang mga benepisyayro makadawat sa ilang sweldo pinaagi sa pagkuha og reference number nga gihatag sa PESO ug makuha kini sa mga branch sa M. Lhuiller.

Ang maong kalihokan gitambungan ni City Mayor, Hon. Jay Warren R. Pabillaran, DOLE Bukidnon Provincial Director, Mr. Raul L. Valmores, City Administrator ug PESO Manager, Atty. Anna Marie R. Bergado, ug Punong Barangay Hon. Manuel Sicalan, III.

Sa iyang mensahe, gipasalamatan og dako ni Mayor Pabillaran ang ahensiya sa DOLE diin kini naggahin og pondo para sa maong programa. Kini nga programa nagpakita sa dedikasyon sa dakbayan sa pagtabang sa mga lumulupyo pinaagi sa paghatag og trabaho ug pagpalambo sa komunidad.

Report: PESO-NADA