Ang Departamento sa Agrikultura Rehiyon 10 ug ang Lokal nga Pangagamhanan sa Malaybalay nagkahiusa sa pag-turn-over sa DA hydroponics project ug ang paglunsad sa pagpang-apod-apod sa LGU corn seeds and fertilizer niadtong Marso 20, 2023 sa City Agriculture Office Compound, Casisang, ning dakbayan.
Isip duha sa nag-unang mga ahensiya nga gahatag og pundo sa City Agriculture Office, tumong niini nga madugangan ang produksiyon ug kita sa mga mag-uuma aron makatampo sa paglambo sa ekonomiya sa dakbayan.
Nagsugod ang aktibidad pinaagi sa ribbon cutting aron pormal nga i-turn-over ang Bayanihan II-Modern Urban Agriculture Project Greenhouse nga adunay Micro-Sprinkler Irrigation System (Hydroponics Technology).
Pormal nga gihatag ang sertipiko sa pag-turn-over sa 1 unit greenhouse, 4 units mushroom growing house, 2,000 bags mushroom fruiting bag, 270 packs polypropylene bag, 2 units all-purpose shredder, 60 bags organic fertilizer, 60 kilograms vegetable seeds, 18 roll A-Net, 1 unit Bag Filling Machine, 12 units Light Hoe, 12 units shovel ug 2 units wheel barrow.
Ang kinatibuk-ang kantidad alang sa gipahayag nga mga interbensyon mokabat sa Php 2,948,115.00.
Ang ceremonial turn-over ug launching gipasiugdahan ni DA-RFO X Regional Director Carlene C. Collado, DA-RFO X Field Operations Chief Dr. Luz Guzman, DA RFO-X HVCDP Focal Person Ms. Kerstein Pagalan, Provincial Operations Center Head Dr. Janeth Lopez, Acting Assistant Provincial Agriculturist Ma. Lilith Turan, City Mayor Jay Warren R. Pabillaran, City Vice Mayor Estelito R. Marabe, City Councilor Alan Ryann O. Legaspi, City Councilor Erwin A. Damasco, City Administrator Atty. Anna Marie R. Bergado, Mr. Neil Nathaniel Palalay II (representante ni Sen. Cynthia A. Villar), City Agriculturist Remedios R. Sarzuelo, CDRRMO Chief Alan J. Comiso, CEEDMO Chief Romeo R. Lapeciros Jr, CPDO Chief Engr. Adrian Gamboa, City Agriculture and Fishery Council Chairperson Leonard O. Leyros, Mr. Dominador Olucro (Netaphil Representative), Bayer Inc. Supervisor Mark Edward Ensong, Malaybalay City Growers Association President Celso Barberan ug Malabalay Vegetable Growers and Industrial Crops Association President Francisco L. Calotes Jr.
Human sa turn-over sa hydroponics, ang LGU-Malaybalay nga gipangulohan ni Mayor Pabillaran naglunsad sa Php 42,134,850.00 nga kantidad sa proyekto ubos sa Production Input Support to Farmers Project nga naglangkob sa 4,761 ka Bags Hybrid Corn Seeds (Dekalb Variety) nga adunay kantidad nga Php 6,300/bag ug 4,761 ka sako 14-14-14 Complete Fertilizer nga adunay kantidad nga Php 2,550.00/bag.
Si Dir. Si Collado sa iyang mensahe nipadayag sa suporta sa DA RFO-X pinaagi sa paghatag ug detalye sa nakalinya nga proyekto para sa mga mag-uuma sa syudad.
Gipahayag niya ang mga budget alang sa Rice, Corn, High Value Commercial Crops, ug Livestock Programs. Lakip niini ang production support projects sama sa Fertilizer Discount Vouchers para sa humay, farm to market roads, farm machineries, corn seeds and fertilizers, industrial crops facility, livestock dispersal ug enterprise development.
Giila ni Mayor Pabillaran ang makanunayon nga suporta sa Departamento sa Agrikultura ug gidasig ang mga mag-uuma nga nakadawat sa pagtabang sa mga proyekto nga gihatag kanila aron mahimong malungtaron.
Samtang giawhag ni Bise Mayor Marabe ang mga mag-uuma nga hunongon na ang kasamtangang middleman system pinaagi sa pag-awhag sa Farmers Associations and Cooperatives (FA/Coops) nga molihok, mo-operate og maayo ug modiretso sa end market sama sa pagbutang og buying station.
Matud pa ni Konsehal Legaspi nga ang Sangguniang Panglungsod nipasiugda og mga ordinansa aron suportahan ang sektor sa agrikultura sama sa pagpatuman sa ordinansa alang sa mga organikong mag-uuma. Samtang, gisugyot ni Konsehal Damasco ngadto sa DA ug LGU nga hatagan pud og priyoridad ang mga mag-uuma sa tubo pinaagi sa paghatag og Cane Harvester tungod sa kakuwang sa mga trabahante.
Gitapos ni CAFC Leyros ang programa pinaagi sa pagpahinumdom sa mga mag-uuma nga pahimuslan ang kahigayonan nga gihatag sa gobyerno aron sa hingpit na nga pagpatuman sa Mandanas-Garcia Ruling andam ang Fas/Coops nga modawat ug modumala sa mga proyekto nga gihatag.
Ni: Gecel QuinquiĊo-Ocon, City Agri-NADA
Photo : Trisha Margaret T. Bustos