Ang lokal nga pangagamhanan sa dakbayan sa Malaybalay nagpahigayon sa ceremonial turn-over sa Rehabilitation of Cultural/Historical Landmark of Plaza Rizal kagahapong adlawa, Pebrero 15, 2023, didto sa Plaza Rizal Park, ning syudad.

Ang nasangpit nga kalihokan gitambongan niCity Mayor Jay Warren R. Pabillaran, Vice Mayor Estelito R. Marabe, City Councilor Kathleen Cecille C. Pagaling, ang nag-unang tigpasiugda sa rehabilitation project, ug uban pa nga mga miembro sa City Council, City Tourism Supervising Operation Officer, Ms. Honolu Marie C. Cruzin, población punong barangays ug miembro sa konseho, Chief Executive Officer sa Jorvivs construction, Engr. Jorge Lagumbay, mga personahe sa City Engineering Office ug uban pang dinapit.

Si Hon. Pagaling, agig pagbukas sa programa, nagpadayag sa iyang kinasingkasing nga pagpasalamat sa mga nangagi ug kasamtangan nga administrasyon tungod sa pagpasa niini nga proyekto ngadto sa kamatuoran: “Akong gi pasalamatan ang kaniadto og karon nga administrasyon ug dapat kini nga proyekto ato kining ampingan, ato kining palanggaon, kay kini gihatag aron magamit sa mga katawhan diri sa syudad sa Malaybalay”.

Sa iyang acceptance message, gipadayag ni Mayor Pabillaran ang ka importansya sa Plaza Rizal sulod sa dakbayan “This is an inter-generational effort kay kahibalo gyud kita nga every generation naa gayud memorable nga experience sa Plaza. This is our time now, kay gitagaan kita ug kahigayonan sa ginoo nga magdumala sa Malaybalay, kay ang plaza mao man ang center gyud sa mga kalihukan”. Nanghinaot usab siya nga mabati sa tanan ang mga kausaban sa dakbayan ug ingon man mabati usab unta sa tanan ang kamadasigon sa pag bisita sa Plaza kay kini para man sa tanan.

Ang bag-ong na-rehabilitate nga Plaza Rizal niabot ug kapin sa 2 ka tuig una kini nahuman tungod sa pandemya ug ayha na turn-over sa kagamhanan sa dakbayan ug kini Phase 1 lamang sa kinatibuk-an nga plano.