Gipahigayon niadtong Agosto 31, 2022 ang ceremonial ribbon-cutting ug pag-ampo alang sa bag-o nga gi-instalar nga Voice/Audio Alarm system nga gipahimutang kilid sa Sawaga river sa Barangay 10.

Ang maong alarm system mag silbing early warning system sa mga katawhan nga nagpuyo kilid sa Sawaga river ug mga kasikbit nga lugar nga posibleng maapektuhan kung adunay pagbaha sa higayon nga adunay bagyo o localized thunderstorms. Aduna usab kini siren extension nga gipahimutang sa Barangay 11 ug Barangay 8.

Atol sa programa , si City Mayor Jay Warren R. Pabillaran nagkanayon nga operational, ready ug activated na ang maong alarm system ug kini dakong tabang sa pagsalba sa kinabuhi ug kabutangan ilabi na sa panahon sa ting-ulan ug bagyo.

Ang pagpahimutang sa maong alarm system kabahin usab sa disaster preparedness program ni Mayor Pabillaran basi usab sa nakalatid sa Republic Act 10121 o ang Philippine Disaster Risk Reduction and Management Act. Kini magamit usab panahon sa pag alarma kung adunay sunog ug uban pang mga emerhensiya.

Mitambong usab sa programa sila si DILG-City Local Government Operations Officer (CLGOO) Mr. Aldrich C. Alaan kinsa Vice Chairman sa City Disaster Risk Reduction & Management (CDRRM) Council for Disaster Preparedness, mga kawani sa CDRRMO, SAR Team ingon man si Pastor Datu Mampadayag Nana Sagubay kinsa nanguna sa pag-ampo.

Report: NADA-CDRRMO