“Zero new active case” ang naitala sulod sa unom ka adlaw ning syudad sa Malaybalay sugod niadtong Abril 27, 2022 hangtud Mayo 2.

Mao kini ang pahayag gikan sa buhatan sa City Health sa pagpanguna ni Dr. Dennis P. Sangalang nga gakupot usab isip local IATF-Covid19 chairperson.

Si Dr. Sangalang kanunay nanawagan sa atong katawhan nga magpabukana na diha sa kasamtangan Vaccination Center nga nahimotang sa Enhanced Screening Area kon ESA, Brgy 4.

Atangi usab ang mobile vaccination skedyul diha sa sikbit ug lagyo nga mga barangay nga gidumala usab sa Resbakuna teams.

Busa atong nasayran nga adunay skedyul i-post sa atong opisyal facebook page sa City Government of Malaybalay matag semana sa adlaw nga domingo.

Dugang hangyo sa atong City Health Officer nga kumpletohon nato ang bakuna gikan sa 1st dose, 2nd dose, ug booster shot. Iyang giklaro nga angayan mobalik to ang naka-skedyul sa ilang 2nd dose ingon man usab ang wala pa ka booster.

Ang edad sa kwalipikado mabakunahan nagsugod sa edad lima ug pataas.

Sa kini nga pamaagi atong matabangan mapakunhod ang kaso sa impeksyon ug pagtakud sa nahisgutang virus.

Sumala pa sa national IATF, ang atong dakbayan uban sa mga lokalidad sa probinsya sa Bukidnon gipailaom sa alert level 1 nga giilang “low risk areas.”