Human sa pagsaulog sa RIC Achievement Day niadtong Nobyembre 17, 2022, ala-una sa hapon nisunod usab pagsaulog ang 4H Club sa ilahang 4H Club Youth Camp and Achievement Day sa alas-tres sa hapon. Kini usab maoy pagbalik sa maong kalihokan sa 4H nga gipahigayon sa City Agriculture Office human nilabay ang pandemya, aron usab paghatag ug bili ug dungog ug pag-ilaila sa mga paningkamot ug bilihong kontribusyon sa mga kabatan-onan nga miyembro sa 4H sa dakbayan.

Ang 4H Club usa ka federasyon nga naa sa ilalom sa kamot sa City Agricultural and Fishery Council (CAFC) uban sa Rural Improvement Club (RIC) nga gilangkuban sa mga kabatan-onan nga single, nag edad 15-30 anyos. Usa kini ka organisasyon para sa mga Out of School Youth (OSY) ug In-School Youth (ISY) nga naay kalabot sa programa sa agriculture ug mga livelihood projects para sa upat ka pilo sa kalamboan sa 4H (Head, Heart, Hands, and Health).

Tumong sa organisasyon nga maka-hatag og oportunidad sa kabatan-onan pamaagi sa “learning by doing” pamaagi sa indibidwal, grupo ug proyekto sa komunidad. Pagpalambo sa pagka-produktibo ug pagsalig sa kugalingon pamaagi sa mapuslanon nga mga proyekto. Nagsilsil sa mga kabatan-onan ang espiritu sa pagboluntaryo, kooperasyon, ug dignidad sa pagpanarbaho. Mamahimo nga ang mga kabatan-onan mugamit sa ilahang oras, talento, ug maayong paggamit sa ilahang enerhiya. Mapalambo ang ilang potensyal ug ilahang panag-uban, pagsabot ug maayong kabubut-on.

Sa taknang alas 6:00 sa gabii gisugdan ang usa ka symposium mahitungod sa droga nga gi-alagad sa maong resource speaker nga si Ms. Ma. Jonah C. Ronolo usa ka Admin III/Anti-Drug Abuse Council (ADAC), gitutukan pag-ayo og hisgut sa maong speaker ang mga hinungdan kung nganong musulod ang kabatan-onan sa pag droga ug ang mga sangputanan niini human paggamit sa maong ginadili nga droga. Gipaila-ila usab sa maong speaker ang mga nagkalain-laing droga ug iyahang epekto sa lawas. Gihisgutan sad ang Comprehensive Dangerous Act of 2002 (RA No. 9165).

Human sa maong symposium gipahigayon ang maong highlight sa kagabin-on ang traditional 4H Candle Lighting Ceremony nga usa ka mahinungdanon nga panghitabo sa panahon sa 4H Youth Camp. Tumong sa seremonya, hingpit nga kahilom ang gikinahanglan sa mga mamiminaw, ug ang pagtukod pag-usab sa panaghigalaay ug pagsalig sa ubang mga miyembro.

Dugang pa ang gipaabot sa kadaghanan ang Ms. 4H Club nga gilambigitan og lima ka mga maanyag nga mga kandidata nga nag representar sa Barangay Managok, Dalwangan, Miglamin, Bangcud, ug Aglayan. Aduna silay nagkalin-laing exposure sama sa Jeans Attire, Evening Gown Attire, Casual Attire, ug Question and Answer portion.

Nagpasundayag usab ang mga miyembro sa 4H sa ilahang mga intermission number nga nilingaw sa mga participante. Gidiklara nga mananaog ang Barangay Managok isip Ms. 4H Club, Barangay Miglamin isip 1st Runner Up, ug Barangay Aglayan isip 2nd Runner Up sa maong kompetisyon.

Gipadayon ang maong kalihokan sa mga kabatan-onan pagka-ugma Nobyembre 18, 2022, gisugdan kini sa pagpahigayon sa Pinoy Olympic kung diin nagdula ang mga bata og mga Larong Pinoy, human sa dula gisugdan ang nagkalain-laing kompetisyon nga naglambingit sa Dish Gardening Contest and Poster Making Contest nga naay temang “Youth Engagement Towards Agricultural Development”.

Human sa Dish Gardening nga kompetisyon gipabalik ang mga bata sa hall para sa usa ka sharing sa usa ka successful nga Young Agripreneur walay lain si Mr. Edsel James O. Quemado, Jr gikan sa Mushroom City Company. Gi-awhag niini ang mga 4H members nga musulod og negosyo, nga mamahimong huwaran nga batan-on sa komunidad, nga makapa-dasig sa ubang kabatan-on nga musulod sa pag-uma kay naay kita ug panginabuhian sa pag-uma.

Ni share pud siya sa ilahang mga naagian kaniadtong gasugod pa sila isip mga bata nga agripreneurs uban iyahang igsoon, ilahang mga pagsulay nga naagian hangtod sa ilahang naabtan karon nga kalampusan. Gitapos niya ang iyahang presentasyon sa paghagit sa mga miyembro sa 4H nga magsugod na kini sa pagmugna og ilahang kaugalingon nga produkto kay walay imposible sa tawo nga dasig mutrabaho.

Human sa maong sharing natapos ang aktibidades sa pag-announce sa mga mananaog. Gidiklara nga unang mananaog sa Poster Making Contest ang Barangay Managok, ug gisundan kini sa Barangay Sinanglanan, Barangay Dalwangan isip ikatulo nga mananaog. Alang sa Dish Gardening Contest gidiklara nga unang mananaog ang Barangay Bangcud, ug gisundan kini sa Barangay Sinanglanan, Barangay Managok isip ikatulo nga mananaog.

Report ni: Chloe Jean B. Beronilla – CagO-NADA