Giaprobahan na sa Sangguniang Panlungsod ang Ordinance No. 1043 S 2024, mao ang ordinansa nga nagdeklara sa Mayo 20 matag tuig nga Liberation Day gikan sa pagsakop sa Japanese Imperial Army niadtong World War 2.

Si Konsehal Royland M. Orquia, uban sa iyang mga myembro sa Committee on Peace and Order nga sila Konsehal Renato S. Sumbongan ug Konsehal Julius N. Manghano, ang nagduso sa nasangpit nga ordinansa.

Gipasar kini sa 2nd reading kaniadtong Hunyo 11, 2024, atol sa ika-95 nga regular session. Subay sa Proclamation No. 653, Series of 1993, nga gipirmahan kaniadtong Setyembre 18, 1995, nagmando sa lokal nga pangagamhanan nga saulogon kada tuig ang mga anibersaryo sa mahinungdanong panghitabo nga may kalabutan sa kalingkawasan sa Pilipinas sa panahon sa ikaduhang gubat sa kalibutan. Natala sa ika-37 sa nasangpit nga proclamation ang Mayo 20 nga mao ang liberation day sa Malaybalay City.

Gideklarar kini nga working holiday ug isaulog sa mga ahensya sa gobyerno, lokal nga pangagamhanan, eskwelahan mapa pribado man o publiko, boy scout, girl scout, civic organization, men in uniform, mga pulis ug sundalo dinhi sa Malaybalay, Bukidnon Veterans District, ug Veterans Federation of the Philippines of Malaybalay City.

Kini nga kasaulugan nagdumdom sa usa ka mahinungdanong panghitabo nga kabahin sa kasaysayan diin angay lamang ang pagtahud ug pasidungog ngadto sa mga beterano nga nakigbisog batok sa mga kaaway ingon man sa sakripisyo ug pag-antos sa mga sibilyan sa panahon sa gubat.

Human sa masusing pagtuon, atol sa ika-96 nga regular session niadtong Hunyo 18, 2024, hiniusang giuyunan sa konseho ang pag-aproba sa maong ordinansa ug kini gi-aprobahan usab ni City Mayor Jay Warren R. Pabillaran niadtong Hunyo 27, 2024.

Tungod niini, masilsil sa kasingkasing ug hunahuna sa katawhan ang patriyotismo labi na sa mga kabataan samtang gi-preserbar ang handumanan sa mga sakripisyo nga nahimo sa panahon sa pakigbisog.

Repot: SP-NADA