Giaprobahan na sa Sangguniang Panlungsod ang Ordinance No. 1038 S 2024, nga mao ang ordinansa nga ginadili ang illegal settlement ug land squatting dinhi sa syudad sa Malaybalay. Kini nga hakbang naghatag ug dakong kalamboan alang sa kalinaw ug kaluwasan sa siyudad.
Ang Chairman sa Committee on Human Settlement, Zoning, and Land Use, Hon. Councilor Erwin A. Damasco, inubanan ni Hon. Councilor Zoltan Dindo D. Dinlayan, mao ang nanguna sa pagduso ug pagpa-aprobar sa nasangpit nga ordinansa. Ang ilang paningkamot ug dedikasyon alang sa maong isyu nakapahimo sa ordinansa nga usa ka realidad, nga gilauman nga maghatag ug dugang pagbag-o sa siyudad.
Ang tumong sa maong ordinansa mao ang mapahugtan ang kampanya batok sa mga informal settler ug mga professional squatter. Kini naglakip sa pagpasiugda ug mas striktong mga patakaran aron malikayan ang mga kagubot ug mga dili kanais-nais nga sitwasyon nga dala sa illegal settlement.
Dugang pa, ang ordinansa naglantaw nga malikayan ang pagtukod ug mga building sa mga lugar nga delikado, sama sa mga daplin sa sapa, aron malikayan ang mga aksidente ug kalamidad.
Human sa masusing pagtuon, atol sa ika-94 nga regular session niadtong June 4, 2024, hiniusang giuyunan sa konseho ang pag-aproba sa maong ordinansa. Kini gihatagan usab ug pinal nga pag-aproba ni City Mayor Jay Warren R. Pabillaran niadtong July 9, 2024. Ang iyang pag-aproba nagpakita sa iyang suporta ug determinasyon nga mapatuman ang mga balaod nga maghatag ug benepisyo sa katawhan.
Tungod niini nga ordinansa, gilauman nga mapabiling hapsay ug malikay sa peligro ang katawhan dinhi sa dakbayan sa Malaybalay. Ang mga residente adunay mas ligdong nga pamuyo ug proteksyon batok sa mga illegal nga aktibidad nga maka-apekto sa ilang kaluwasan ug kabtangan.
Report: SP-NADA
Photo Credit: Hon. Erwin A. Damasco