Giaprobahan na sa Sangguniang Panlungsod ang Ordinance No. 1042 S 2024, mao ang ordinansa mahitungod sa Firecracker ug Pyrotechnic.
Unang giduso ni konsehal Royland M. Orquia ang ordinansa mahitungod sa Firecracker ug Pyrotechnic kaniadtong Hunyo 20, 2023, atol sa ika-48 nga regular session. Gipresentar kini sa 2nd Reading kaniadtong ika-91 nga regular session, Mayo 14, 2024, ug sa ikaduhang higayon kaniadtong ika-93 nga regular session, Mayo 28, 2024, uban sa mga membro sa Committee on Peace and Order nga sila Konsehal Renato S. Sumbongan, IPMR Representative ug Konsehal Julius N. Maghano, Liga President.
Kabahin na sa kultura ug tradisyon sa mga Pilipino ang paggamit ug pabuto ug pyrotechnic sa pagselebrar sa mga kapistahan, Pasko ug Bag-ong Tuig, apan kini nga kasaulogan nahimong hinungdan usab sa kamatayon, pagkaguba sa mga propriedad, ug pagkaangol sa uban tungod sa hiwi nga paggamit sa maong pabuto.
Ang Department of Interior and Local Government (DILG), Department of Health (DOH), Department of Finance (DOF) ug Department of Trade and Industry (DTI) nagpagawas ug Joint Memorandum Circular No. 1 Series of 2014 nga gimanduan ang ahensya sa gobyerno nga ipatuman ang Republic Act No. 7183 sa pag-regulate sa pagbaligya, pag-apod-apod, paghimo ug paggamit sa mga pabuto ug uban pang mga pyrotechnic.
Alang sa kaluwasan, kahusay ug kalinaw sa katawhan sa siyudad sa Malaybalay, nakita sa Sanggunian ang importansiya sa pag-mugna sa nasangpit nga ordinansa aron usab maproteksiyonan ang katawhan ug mga propriedad sa posibleng aksidente tungod sa mga pabuto. Dugang rason sa maong ordinansa mao nga mapahibalo ang katawhan sa pwede ug gi-bawal nga mga pabuto ug pyrotechnic.
Ang mga musunod nga firecracker ug pyrotechnic mao ang pwede ug gitugutan niining ordinansa: baby rocket; bawang; small triangulo; pulling of strings; paper caps; el diablo; watusi; Judah’s belt; sky rocket (kwitis); sparklers; luces; fountain; jumbo regular ug special; mabuhay; roman candle; trompillo; airwolf; whistle device; butterfly ug uban pang susama sa nasangpit nga pabuto.
Ang gibawal niining ordinansa mao ang musunod: atomic big triangulo; super lolo; BOGA; giant whistle bomb; big watusi; napoles; pacquiao; pla-pla; sky lantern; big piccolo; goodbye Philippines; big Judas belt; thunder lolo ug uban pang susama niining nasampit nga pabuto.
Natala sa maong ordinansa ang uban pang mga prohibisyon, regulasyon, kwalipikasyon ug giya sa pagbaligya, paggamit, paghimo ug pag-apod-apod sa mga nasangpit nga mga pabuto ug pyrotechnic.
Human sa masusing pagtuon, atol sa ika-94 nga regular session niadtong Hunyo 4, 2024, hiniusang giuyunan sa konseho nga aprobahan ang maong ordinansa ug giaprobahan usab kini sa atong City Mayor Jay Warren Pabillaran kaniadtong Hulyo 9, 2024. Tungod niini, masiguro nga luwas ang katawhan ug maprotektahan ang mga propriedad sa posibleng kadaut tungod sa paggamit sa bawal nga mga pabuto.
SP-NADA