Sa hiniusang paningkamot aron maminusan ang epekto sa El Niño sa agrikultura, ang lokal nga pangagamhanan sa Malaybalay pinaagi sa City Agriculture Office (CAgO) ug City Treasurer’s Office (CTO) nag-apod-apod sa tabang pinansyal ngadto sa 2,688 nga apektadong mag-uuma kaniadtong Hunyo 27, 2024 sa Violeta Covered Court, ning syudad.

Ang suporta nagtumong sa pagpagaan sa ekonomikanhong epekto tungod sa dugay nga ting-init, nga nakadaot sa kinatibuk-ang luna nga mikabat sa 2,184.89 ektarya sa humay, mais, high value commercial crops ug inland fisheries sa tibuok siyudad sukad niadtong Enero 2024.

Matag kuwalipikadong mag-uuma nakadawat og Php 5,000 kada ektarya. Mikabat kini sa kinatibukang kantidad nga Php 10,999,187.50, aron makatabang sa pagpalit sa mga kinahanglanon nga galastuhan taliwala sa pagkawala sa pananom ug pagkunhod sa produksyon sa kaumahan.

Gitambungan ang maong kalihokan nila ni Mayor Jay Warren R. Pabillaran, Konsehal Alan Ryan O. Legaspi, Konsehal Niko P. Aldeguer, City Disaster Risk Reduction Management Office (CDRRMO) Chief Alan J. Comiso, City Treasurer Rosie T. Dumas, City Agriculturist Richard B. Leono, ug Barangay Kagawad Roderick Mariano.

Gipadayag ni Mayor Pabillaran nga ang Lokal na Pangagamhanan nagsiguro sa kaayohan sa mga apektadong mag-uuma taliwala sa pabag-o bag-o nga panahon, busa nangita og mga pamaagi nga mahatagan og cash assistance pinaagi sa CDRRM Fund.

Ang inisyatibo nagtimaan sa usa ka mahinungdanong lakang ngadto sa komprehensibong estratehiya sa Malaybalay sa pagpalig-on batok sa mga epekto sa tag-init. Sumala pa, gidasig sa opisyales ang mga mag-uuma nga mapuslan kini aron mapadayon ang pagpananom sa tagsa-tagsa nga kaumahan.

Dugang pa, ang siyudad kanunay nangandam sa mga hagit dala sa panahon ug nagpabiling lig-on para sa pagsuporta sa mga komunidad alang sa malungtarong kalamboan sa tibuok Malaybalay.

ni: Gecel Quinquiño-Ocon, City-Agri NADA