Gitunol ang pasidungog ngadto kang Ms. Lhutes Khate Paano Malapad, LPT sa gipahigayon nga 95th regular session karong adlawa June 11, 2024 didto sa SP Session Hall, Old City Hall building, Malaybalay City nga gitambongan sa mga opisyales ug mga kawani sa lokal nga pangagamhanan sa Malaybalay.

Hibaluan nga sa gipahigayon nga March 2024 Licensure Examination for Professional Teachers (LEPT), adunay tulo (3) ka Topnotchers nga gikan sa Bukidnon State University ug usa niini taga Malaybalay City.

Giduso ni Councilor Zoltan Dindo D. Dinlayan nga hatagan sa pasidungog ug pagdayeg si Ms. Malapad diin nakab-ot niya ang Top 7 sa nasangpit nga LEPT para sa elementary level.

Si Ms. Malapad, LPT nagpuyo sa Purok 2, Barangay Kalasungay. Dakong garbo sa barangay ug sa katawhan sa Malaybalay ang talagsaon nga kalampusan. Gipakita niya ang pagkamalahutayon ug kakugi sa iyang gipili nga propesyon.

Angay lamang ang pasidungog nga gihatag kang Ms. Malapad aron magsilbi kini nga sumbanan ug inspirasyon sa mga kabatan-onan ug sa umaabot pa nga generasyon nga maningkamot ug magmakugihon sa pagtuon aron ilang makab-ot ang kalampusan nga ilang gipangandoy.

Report: SP-NADA