Sa usa ka mahinungdanon nga kalihokan sa Dakbayan, ang Cacao Community-based Development Enterprise Project opisyal nga gitugyan sa Department of Agriculture (DA) Region X ngadto sa Lokal nga Pangagamhanan sa Malaybalay niadtong Hunyo 21, 2024 sa Casisang, Malaybalay City.
Ang proyekto nagkantidad ug Php 7,980,000.00 nga gilangkuban sa training component, planting materials, nursery, multi-commodity solar drier fermentation shed, hauling truck, processing facility, ug nagkalain-laing kagamitan sa agrikultura ang nadawat sa Malaybalay City Cacao Growers Agricultural Cooperative (MCCGAC).
Ang pagtukod sa nasangpit nga proyekto sa kasagaran nagtumong sa paghatag ug dugang suporta sa Cacao-based Enterprises sa LGU pinaagi sa nagkalain-laing interbensyon nga makapauswag sa produktibidad, makahaw-as gikan sa kakabos, makapauswag sa panginabuhian ug makadugang sa kita sa mga mag-uuma.
Ang aktibidad gitambongan nila ni Mayor Jay Warren R. Pabillaran, Konsehal Niko P. Aldeguer, Konsehal Erwin A. Damasco, DA-RFO X HVCC Representative Mr. Ian Camado, Provincial Operations Center Head Dr. Janeth D. Lopez, Provincial Science & Technology Director Ritchie Mae L. Guno, DTI Provincial Dir. Famelah Raquel D. Villanueva, City Agriculturist Engr. Richard B. Leono, Barangay Kagawad Cerilo Bonggolto, ug MCCGAC Chairman Jerome N. Ramirez.
Ang Ceremonial Tun-over of the Key of Responsibility gipatuman human sa presentasyon sa overview sa proyekto nga gihatag ni Mr. Camado, diin iyang gipatin-aw ang mga tumong, benepisyaryo, dagan sa proseso ug operasyon niini.
Atol sa programa, si Dr. Lopez nihatag ug mensahe sa ngalan ni DA Regional Director Jose Apollo Y. Pacamalan. Iyang gipasabot nga ang ribbon cutting ceremony usa ka simbolo sa pasalig ug panaghiusa aron makab-ot ang tumong sa pagproseso sa cacao. Nagpasalamat siya sa mga mag-uuma, partner nga ahensya, ug tanang stakeholders sa suporta ug kooperasyon aron masugdan ang proyekto. Dugang pa niya nga ang industriya sa cacao adunay dako nga potensyal sa siyudad ug gipaabot nga pipila ka tuig gikan karon ang mga tsokolate maka-supply lakip sa gawas sa nasod.
Giila gilayon ni MCCGAC Chairperson Ramirez ang City Agriculture Office ilabina ang ilang coordinator nga si Mr. Marvin L. Zamora sa iyang pagtabang sa pagpadali sa ilang pagparehistro sa Cooperative Development Authority (CDA). Dako iyang pasalamat sa CAgO nga nahimong instrumento aron matuman ang maong proyekto.
Ang produksiyon ug pagproseso sa cacao sulod sa mga kooperatiba nagsilbi dili lamang usa ka paagi sa panginabuhian, kon dili usa usab ka dalan ngadto sa malungtarong kalamboan, kalig-on sa komunidad, ug inklusibo nga pagtubo. Pinaagi sa pagpahimulos sa kolektibong aksyon ug gipaambit nga mga kahinguhaan, ang mga kooperatiba adunay hinungdanon nga papel sa pagpauswag sa socio-economic nga kaayohan sa ilang mga miyembro ug pagpasiugda sa malungtarong mga gawi sa industriya sa cacao.
Ni: Gecel Q. Ocon, City Agri-NADA