Malampusong gipahigayon ang Panahik Hike, Plant, Camp ug Jam didto sa Two trees, Can-ayan, Malaybalay City pinaagi sa City Environment & Natural Resources Office (City ENRO) niadtong June 23-24, 2022.

Ang tumong sa maong kalihokan ang pagpalambo sa lokal nga turismo ug modani sa lokal nga turista sa pagbisita ug pagpasalamat sa atong potensyal nga destinasyon sa Ecotourism. Kini alayon usab sa selebrasyon sa ika-145 Aldaw ta Malaybalay, uban sa pagpanguna ni City Mayor Jay Warren R. Pabillaran.

Makita usab ang pagsuporta ni City Administrator Atty. Anna Marie R. Bergado sa maong panghitabo ug mapasalamaton siya sa CENRO sa ilang pagka makugihon nga gipanguluhan ni Maria Anita Fernandez. Ingun niya, “Karon nga activity ang usa sa akong pinaka gihandom nga apilan, malimtan man gali nato ang petsa karon pila ka tuig mulabay pero ang mga gipangtanom, ug ang gugma sa kinaiyahan magpabilin mabungahon”.

Mokabat sa 900 ka Pine Trees ang gitanom sa tibuok dapit nga giila ug giandam sa City ENRO kauban ang mga personnel gikan sa Bukidnon Environmental Natural Resources Office (BENRO).

Nitambong ang usa ka sikat nga International Artist gikan sa Talaandig nga komunidad sa Songco, Lantapan nga si Datu Waway Saway. Ang presentasyon niya nasentro sa pagpasiugda sa kultura ug pagpanalipod sa kinaiyahan. Kauban niya sa pagtugtog ang Talaandig Republic, City Band, Borja Band ug ang Power Monkeys Band.

Ang usa ka oras nga presentasyon nahimong highlight alang sa jamming night nga gilangkuban sa 200 ka campers lakip na ang mga organizers uban pud sa mga mananan-aw, ug bisita gikan sa duol nga komunidad lakip na ang mga trabahanti sa lokal nga pangagamhanan sa syudad sa Malayabalay.

Kauban usab ang mga representante sa Multi-purpose Cooperatives, Armed Forces of the Philippines (403rd Brigade ug 8th Infantry Battalion), Philippine National Police – Malaybalay City Police Station, Konseho sa Barangay 9 ug Can-ayan ug ang National Commission for Culture and Arts.