Gipanghingusgan ni Mayor Jay Warren R. Pabillaran ang dayag kon transparent nga proseso sa Public Bidding atol sa iyang pamahayag sa usa ka media interview.

Gisiguro ni Mayor Pabillaran nga abri ug bukas alang sa tanan ang matag pagahimoun nga bidding sa City Bids and Awards Committee (BAC) basi sa mandato sa Government Procurement Act.

Kini nga pamaagi usab atong masaksihan basi sa mando sa Mayor nga ipahigayon ang matag bidding live via facebook sa BAC LGU MALAYBALAY matag miyerkules alas dos sa hapon.

Tumong sa maong inisyatibo nga maangkon sa syudad sa Malaybalay ang dekalidad nga proyekto labi na sa construction sa dalan, tulay, covered court, bulidings ug uban pa nga gitutokan sa Mayor nga adunay kasamtangan nga pundo nagkantidad hapit Php 600-million.

“Kani na opportunity akong ipahibalo diri sa Malaybalay, sa Bukidnon, sa Region 10 o sa tibuok Mindanao, tibuok Pilipinas na mga construction company anhi kamo sa Malaybalay, open ang Malaybalay. Ayaw mo kahadlok, kay dili namo lisod lisoron diri sa Malaybalay, icomply lang ninyo ang mga requirements sa Malaybalay anhi mo diri. Kung lisod lisoron mo sa isa ka opisina, ako makagarantiya ko sa inyoha adto mo sa opisina sa Mayor kay tabangan tamo,” matud pa ni Mayor Pabillaran.

Gilauman usab ni Mayor Pabillaran nga masabtan sa katawhan ang kini nga pamaagi aron ang kwarta sa gobyerno nga gikan sa katawhan nga mahan-ay ug sakto ang pag implementar sa nagkadaiyang programa, proyekto, ug kalihokan alang sa ikalambo pa sa dakbayan.