Malampusong gisugdan ang pagsaulog sa ika 145th Aldaw ta Malaybalay program sa usa ka pamuhat sa Folks Art Theatre alas singko sa buntag niadtong Hunyo 15, 2022. Ang pamuhat o pangampo didto sa Magbabaya ginabuhat aron pagagiyahan pa ug mamaayo pa ang atong syudad.

Sa maong panagtigum, si Vice Mayor Estelito Marabe giabi-abi ang tanan pinaagi sa pag ingon nga “Angayan kita mag balik ug lantaw sa kagahapon, maghinumdom sa mga pagtulun-an base sa atong mga kasinatian og para mapasalamatan ang atong mga lideres ug mga katigulangan nga mao ang nagmugna sa Malaybalay.” Dugang pa niya nga dii nato sayangon ang mga kalampusan sa kagahapon.

Sa ikaduhang bahin, adunay video nga gipasalida bahin sa kasaysayan ug usa ka cultural show sa BukSU Dance Troupe kung aha nagsugod ang Malaybalay. Gipahigayon sab ang usa ka Ritual ug Pandang-ul ceremony kung asa si City Mayor Jay Warren Pabillaran gibunyagan ug ginganlan nga “Datu Makabugwas,” isip giuyonan sa mga pangulo sa tribu.

Ang maong ritwal ug seremonyas gilangkuban kini sa mga nagkadaiyang ritwalis, mao sila si Datu Edilberto Balo-an, Datu Nestor Menaling, Datu Armando Molanta, Datu Adolfo Anud-anud, Bae Pacita Cabusao, Bae Erlinda Bonye, Datu Harry Sumbongan, Datu Claudio Casinabe, Datu Floro Guaynon, Datu Virgilio Namoc, Bae Adelina Tarino, Datu Marjor Baconguis ug Datu Edilbrando Sawayan.

Sa pamahayag ni Mayor Pabillaran, nangayo siya og pasaylo gumikan dili niya gusto mahimong sentro sa atraksyon ug nagpasalamat sa tanang mga tawo nga nagpaluyo sa kalampusan sa programa. “Kung balikan lang nato ang atong kasaysayan, atong dato nga kultura, mga pamaagi – dili kita mawala,” midugang siya.

Gawas niana nanghinaut siya nga maampingan ang atong kasaysayan ug para sa mga Lumad – dili mabiyaan ang kagikan. Nanghinaut sab siya nga ang iyang presensiya isip usa ka mayor o datu, makahatag ug kalamboan, kaayohan sa katawhan ug inspirasyon sa mga lumulupyo sa siyudad.

Dugang niana, naghatag sad ug nagkalain-laing mga plake ug pag-ila sa mga mananaog sa “Search for the Cleanest and Greenest Barangay 2021”, “Search for the Best ESWM and Greening Program Implementing School 2021” ug “CY 2022 Lupong Tagapamayapa Incentive Awards (LTIA) Assessment.