Giaprobahan na sa Sangguniang Panglungsod ang memorandum of agreement tali sa City Government of Malaybalay, Department of Social Welfare and Development – Social Technology Bureau ug ang Department of Social Welfare and Development – Field Office 10 alang sa pag-implementar sa usa ka interbensyon nga giilang, “ProtecTEEN: Psychosocial Support and Other Interventions for Adolescent Mothers and their Families,” diri sa syudad.

Ang maong kasabutan pinasubay sa SP Resolution No. 2022-13 nga giduso ni Councilor Brian Nelson Flores ug gi-uyonan usab sa konseho niadtong Hulyo 25, 2022 sa ilang ika-upat nga regular session. Tungod niini, gihatagan sa pagtugot si Mayor Jay Warren R. Pabillaran nga ipatuman ang maong pilot program.

Sigon sa Administrative Order 19, serye 2020 sa DSWD-GAD agenda (2020-2025), gimugna ang maong interbensyon alang sa pag-protektar sa mga teenage mothers ug teenage parents. Gilayon nga mahatagan sila sa psychosocial support, kapasidad ug uban pa nga lakang aron mabaton ang ilang responsibilidad isip mga bag-ong ginikanan.

Usa sa tulo ang Malaybalay City nga napili sa DSWD isip pilot area para sa maong programa. Susamang dagan sa implementasyon usab ang ipatuman sa laing pilot areas sa CALABARZON ug National Capital Region. Matod pa sa DSWD, napili ang atoang dakbayan tungod kay taas ang natalang mga kaso sa teenage pregnancies sa Malaybalay City sa milabay’ng mga katuigan.

Tumong usab sa maong kalihokan nga malikayan ang sayo, wala sa plano, ug pag-sige ka buros sa mga kabatan-onan ug hilabi na ang teens-at-risk.

Sumala pa sa United Nation Population Fund (UNFPA) ug ang Philippine Statistics Authority, adunay 65% nga pagsaka sa teen pregnancy sulod sa tuig 2000 hangtud 2010 ug gibana-bana nga adunay 24 ka bata gianak matag oras.

Dugang pa niini, sugod sa tuig 2014 nagpabilin nga isyu ang kaso sa pagsaka sa teenage pregnancies nga maoy nailang pinakataas diha sa ASEAN countries.

Karong Agosto pagasugdan ang pilot program sa duha ka identified barangays, ug ipahigayon usab sa maong bulan ang pormal nga MOA signing nga pagatambungan sa national officials sa DSWD ug sa atoang amahan sa dakbayan, City Mayor Pabillaran.

Human sa MOA signing, maghatag ang DSWD sa orientation sa mga service providers nga mao mismo ang mag-atubang sa mga teenage mothers ug ilang pamilya.

Report: SP-NADA