Ang lokal nga pangagamhanan sa Malaybalay nagpahigayon ug media forum atol sa pagsaulog sa National Disaster Resilience Month, karong adlawa, Hulyo 29, 2022 didto sa Peoples’ Hall sa City Hall, Brgy. Casisang

Nagdala sa tema, “Sambayanang Pilipino, Nagkakaisa Tungo sa Katatagan at Maunlad na Kinabukasan,” gigahinan ug igong oras gikan sa upat ka vice chairpersons sa City Disaster Risk Reduction and Management (DRRM) Council nga mapasabot ang tagsa-tagsa ka programa diha sa area sa disaster preparedness; prevention and mitigation; recovery and rehabilitation; ug lakip ang disaster response.

Naapil usab sa maong hisgutanan ang Covid-19 update ug dengue cases sa siyudad nga gi-report sa City Health Office. Lakip gipresentar ang mga kalihokan ug gingbuhaton sa CDRRMO nga nagpadayon sa pagserbisyo diha sa komunidad alang sa pagpangandam ug pagresponde.

Gitambongan sa 30 ka personahe sa media, gipasabot ni Atty. Julius Michael G. Barroso, isip City Administrator – OIC ang mga katuyoan nga mapaabot ang impormasyon sa nagkadaiyang plano, programa, proyekto ug aktibidades sa syudad sa Malaybalay nga adunay kalabutan sa kalamidad, disaster preparedness ug response.

“Pinaagi sa inyo, kamo naa sa media angay pud makisayod, makapangutana, o kaha maka-suggest para kami nga lumilihok sa gobyerno aduna pud makat-unan gikan sa inyohang mga input,” sumala pa ni Atty. Barroso sa iyang mensahe pagbukas sa Kapihan.

Gipaabot usab ni Special Assistant to the Mayor nga si Atty. Mitchell D. Talatala, ang thrust ni Mayor Jay Warren R. Pabillan mao ang gitawag nga SHIELD kon diin isa sa 6-point agenda niini mao ang “Safe, security, and disaster preparedness,” ug siya minakanayon, “Hinaut matabangan nato ang atong Mayor nga mapasibya ang mga pagpangandam hilabi na sa kalamidad.

Gibutyag usab ni Atty Talatala ang tumong nga malikayan ang dako nga kadaut ug makab-ot ang gihandum nga, “zero casualty.”

Sa ulahing bahin sa programa, nahisgustan ang nagkadaiyang concerns ug mga pangutana gikan sa atong media nga gitubag sa atong panelists aron mahatagan og katinawan.