Giaprobahan na sa Sangguniang Panlungsod ang SP Resolution No. 2022-009, mao ang Memorandum of Agreement(MOA) tali sa City Government of Malaybalay (CGM) ug sa Department of Agriculture-Regional Field Office 10 (DA-RFO 10) mahitungod sa pagtukod og trading post sa dakbayan sa Malaybalay.

Kaniadtong Hulyo 11, 2022, ang buhatan sa City Mayor nag endorso ngadto sa Sangguniang Panlungsod nga maaprobahan ug mahatagan sa pagtugot ang halangdong Mayor Jay Warren R. Pabillaran sa pagsulod sa nasangpit nga MOA.

Nasayran usab nga ang DA naglunsad sa “Enhance Kadiwa Inclusive Food Supply Chain Program,” aron masiguro nga adunay igong suplay sa pagkaon ang katawhan hilabi na sa panahon sa pandemya.

Aron mahatagan ug katumanan ang maong programa, gi-implementar ang usa sa proyekto nga giilang “Trading Post” sa tumong nga matabangan ang mga farmers ug fisherfolk, cooperatives and associations nga mapalambo pa ang ilang produkto sa agrikultura, income, trabaho, ug labaw sa tanan sakto ug ubos na presyo alang sa konsumante.

Ang maong resolusyon giduso ni Councilor Alan Ryann O. Legaspi ug hiniusang gi-uyonan usab sa konseho niadtong Hulyo 26, 2022 atol sa ilang ika-upat nga regular session.

Nahitala sa maong kasabotan nga ang DA-RFO 10 mag-gahin ug magpagawas og pundo nagkantidad Php 5 milyon alang sa pagtukod sa maong Trading Post nga adunay 10-year operation sugod sa petsa nga kini pagasugdan.

Giuyunan usab sa duha ka partido ang uban pang mga termino ug mga kondisyon nga nahisulod sa MOA aron mapatuman alang sa kaayuhan sa katawhan sa dakbayan.

Report: SP-NADA