Ang City Agriculture and Fishery Council (CAFC) nagsilbing kaabag sa departamento sa agrikultura ug naglihok isip usa ka espesyal nga advisory body nga nag-umol ug garekomenda sa maayong mga palisiya ug programa alang sa malahutayong kalamboan sa duha ka sektor sa agrikultura ug pangisda. Matag ika-tulo nga bulan, gapahigayon ang CAFC sa ilanmeeting aron tukion ang mga isyu ug mulo sa agrikultura ug pangisda nga nahitabo sulod sa siyudad.
Ang third quarter meeting nahitabo niadtong Agosto 19, 2022 sa Farmers Training Center ibabaw sa buhatan sa City Agriculturist’s Office sa Brgy. Casisang. Gitambongan ang maong panagtigum ni City Mayor Jay Warren R. Pabillaran ug mga representante/coordinator sa lain-laing ahensya sama sa National Food Authority (NFA), Philippine Coconut Authority (PCA), Regional Agriculture and Fisheries Council (RAFC), Provincial Agriculture and Fisheries Council (PAFC), ug sa City Veterinary Office.
Si City Agriculturist Remedios R. Sarzuelo nagsugod sa iyang mensahe diha sa pahayag sa mission ug vision sa dakbayan sa Malaybalay, ug gihatagan niya’g kabug-aton ang agrikultura isip usa ka nag-unang kontribyutor sa pagkab-ot sa panglantaw sa siyudad. Giila niya ang mga mag-uuma nga nag-una nga tigpalihok sa pag-uswag sa ekonomiya, ug nga nagpakaon sa mga indibidwal sa lokalidad. Giila usab niya ang ilang mga paningkamot pinaagi sa lain-laing mga rural-based organizations nga ilang gikalambigitan.
Ang mga lider-mag-uuma nga mitambong atol sa tigum gihatagan ug panahon sa pagpasaka sa ilang mga isyu ug kabalaka. Lain-laing mga lider sa sektor ang mipadayag sa ilang mga panginahanglan nga mao ang Malaybalay City Farmers Irrigator’s Association (MCFIA), Malaybalay City Corn Growers Association (MCCGA), Malaybalay Vegetable and Industrial Crops Association (MAVEGICA), Malaybalay Agro-Eco Farmers Association (MAEFA) ug Malaybalay City Agriculture Cooperative.
Gitubag ni Mayor Pabillaran ang matag usa sa mga mulo nga gipadangat sa mga presidente sa asosasyon. Iyang giawhag sila sa pagpataas sa ilang tingog ug kahibalo sa budget planning, ug naghatag siya pipila ka pananglitan gikan sa ubang nasud, sama sa India, nga aduna’y gitakna na panahon sa budgeting.
Naghatag dayon ang lain-laing mga ahensya ug mga update aron mapaambit ang kasayuran sa mga miyembro sa konseho. Si Dr. Aulyn Mae L. Salem sa City Veterinary Office nihatag ug updates sa schedule sa veterinary services sa mga barangay ug nitubag sa mga pangutana ilabina mahitungod sa Avian Influenza.
Giklaro usab ni Rhodnalyn Manlawe sa National Food Authority nga ang NFA dili na alang sa importasyon apan usa na sila ka buffer stocking agency nga motabang sa natad sa kalamidad. Iyang gidasig ang mga mag-uuma nga ibaligya ang ilang produkto ngadto sa NFA (ready for milling na humay na naay 14% moisture content) sa ₱19.00/kilo. Giawhag usab ni Adoracion V. Daculos sa PCA ang mga tigpaminaw sa pagparehistro sa ilang mga mag-uuma sa lubi sa National Coconut Farmers Registry Information System (NCFRIS).
Sa laing bahin, si Ms. Mischelle Egama sa RAFC mihatag ug mga update sa katumanan sa CAFC sa mga termino nga gipahigayon sa mga miting ug mga resolusyon nga gisumite na, samtang si PAFC Coordinator Catherine D. Galero sa Provincial Agriculture Office nipadayag sa suporta sa probinsiya ug nipahinumdom sa mga mag-uuma nga magparehistro sa Registry System for Basic Sectors in Agriculture (RSBSA) alang sa umaabot nga mga serbisyo.
Ang tukma nga miting nahitabo diin ang lainlaing mga mulo gihisgutan. Gisundan kini sa Chairman ug Treasurer’s Reports. Ang ubang mga butang gi-istoryahan usab diin dugang nga mga hilisgutan ang gipatungha.
Ang Malaybalay City Agriculture and Fisheries Council isip usa ka institutionalized body nagtabang sa pagpauswag sa sektor sa agrikultura ug pangisda sa dakbayan. Ang miting makapahimo sa konseho sa pagpakigsulti ug pagpaambit sa impormasyon, pagtukod og koordinasyon ug pagpalambo ug paglihok sa mga proyekto sa unahan.
Ni: GECEL Q. OCON, CAgO-NADA