Ang Public Employment Service Office (PESO) nanguna sa pag-apod apod sa gidahom nga sweldo sa 248 ka benepisyaryo sa Special Program for Employment of Students (SPES) niadtong August 16, 2022 didto sa People’s Hall, New City Hall, Casisang, Malaybalay City.

Ang SPES usa sa mga programa sa Department of Labor and Employment (DOLE) para sa mga kabataan diin makahatag og temporaryong panarbaho sa mga kabus pero takos nga mga estudyante, out-of-school youth og displaced workers sa panahon sa school break o panahon sa summer o ting-init. Tumong niini nga makahatag dugang kita sa pamilya aron pagsiguro nga mapadayon og masuportaan ang edukasyon sa mga kabataan.

Nauna na niini ang pagpahigayon sa SPES Orientation nga gihatag sa kawani sa PESO og DOLE niadtong June 30, 2022 didto sa Barangay 9 Covered Court, Malaybalay City. Kini usa ka requirement nga dapat mapaabot ngadto sa mga kabataan sa dili pa magsugod ang ilang trabaho.

Niadtong July 4 – 29, 2022, nagmalampuson ang paghatag og temporaryong panarbaho sa 248 ka SPES beneficiaries diin sila na assign sa mga nagkadaiyang tunghaan og opisina sa Malaybalay City sulod sa beinte (20) ka adlaw.

Pinaagi sa pag abag sa City Treasurer’s Office, ang maong mga kabataan nakadawat niadtong August 16, 2022 sa 60% sa nagaluntad nga minimum wage or katumbas sa P6,564.00 kada usa gumikan sa pondo sa LGU Malaybalay. Ang nahabiling 40% nga mag gumikan sa pondo sa DOLE madawat nila sa katapusang bahin sa bulan sa Agosto.

Nianang adlaw, gipaabot sa mga benepisyaryo ang ilahang pagpasalamat tungod kay ang maong sweldo dako og ikatabang sa ilahang pag eskwela. Gawas niana, gisaysay nila ang ilahang kalipay sa mga kasinatian sa pagpanarbaho.

Sumala sa mensahe ni Atty. Anna Marie R. Bergado, City Administrator og PESO Manager nga unta magamit sa saktong tumong ang kwarta nga madawat sa mga kabataan. Gi-emphasize niya nga kini tabang para masuportaan ang edukasyon nila aron sila makalampos sa ilahang pag eskwela. Og sa katapusan, gipasalamatan niya ang local nga pangagamhanan sa Malaybalay sa makanunayong suporta sa maong programa.

Report: CMO-PESO NADA