Ang lokal nga pangamhanan sa Malaybalay pinaagi sa buhatan sa City Disaster Risk Reduction and Management ug sa pakigtimbayayong sa Department of Science and Technology (DOST-Pagasa) nagpahigayon ug Dedication and Turn-over ceremony sa Audible Early Warning Device nga gipahimutang sa Sitio Panamucan, Barangay San Jose niining syudad niadtong Setyembre 27,2022.

Ang maong seremonya gipangunahan City Mayor, Hon. Jay Warren Pabillaran, inubanan sa mga miyembro sa konseho sa barangay San Jose pinangulohan ni Punong Barangay Bebina Ke-e, mga kawani sa DOST-Pagasa Bukidnon ug mga personahe sa CDRRMO Malaybalay gipangunahan ni LDRRMO OIC Alan J. Comiso.

Ang maong kahimanan dakong tabang sa mga lumulupyo sa maong sitio ilabi na kung adunay pagkadaut sa panahon diin kini ang maghatag kanila og abiso kung unsa ang angay buhaton panahon sa emerhensiya partikular kung adunay makusog nga pag-ulan nga posibleng moresulta sa pagbaha ug pagdahili sa yuta. Ang sitio Panamucan sa barangay San Jose ang gikonsiderar nga usa sa mga hazard prone areas (landslide ug flooding) sa atong syudad.

Matud pa ni halangdong Mayor Pabillaran sa iyang mensahe, “Dili na nato hulaton nga ayha na kita moresponde kung nahitabo na, kinahanglan gyud ang pagpangandam”, isa lamang kini sa mga programa ilawom sa Disaster Preparedness aron mahilikay sa disgrasya ug pagka kalas sa kinabuhi sa komunidad sa Panamucan. Nanghinaut ang lokal nga panggamhanan nga ampingan og protektahan ang maong kahimanan kay kini adunay dako kaayong tabang para sa seguridad sa tanan.

Dugang pa niini, gitunol usab ang portable handheld radio aron mas mapadali ang paglabay ug impormasyon gikan sa maong sitio padulong sa buhatan sa CDRRM panahon sa emerhensiya ingon man usab ang first-aid kit. Pipila lamang kini sa programa sa buhatan aron mapahingusgan ang disaster preparedness program sa syudad.

Report: NADA – CDRRMO