Ang City Agriculture Office (CAgO) sa pakigtambayayong sa pagsaulog sa ika-20 ka tuig nga Kongreso sa Agricultural and Fishery Council o mas gi-ila nga “TAPOK MAG-UUMA 2022” niadtong Nobyembre 16, 2022, nisunod usab niini ang pagsaulog sa Malaybalay City Federation of Rural Improvement Club (MCFRIC) Achievement Day 2022 niadtong Nobyembre 17, 2022 sa Veranda, Casisang, Malaybalay City.
Kini maoy pagbalik utro sa tinuig nga kalihokan sa RIC nga gipahigayon sa CAgO human nilabay ang pandemya, aron paghatag ug bili ug dungog ug pag ila-ila sa mga paningkamot ug bilihong kontribusyon sa mga myembro sa RIC sa dakbayan. Mao usab kini nga panahon diin lainlain nga agricultural nga mga produkto ang gipasundayag sa mga myembro sa federasyon aron mapakita ang ilang mga negosyo.
Ang RIC Achievement Day 2022 gisalmotan sa 100 ka mga partisipante nga gilangkuban sa RIC President matag barangay ug lima ka miyembro niini, mga empleyado sa City Agriculture Office ug lain-laing buhatan sa Lokal nga Pangagamhanan sa Malaybalay.
Gi-awhag ni City Agriculturist Remedios R. Sarzuelo ang mga miyembro sa dili pag-undang pagbuhat ug pagpasa og mga Letter of Intents (LOI) para sa ilahang mga kinanghalonon nga mga proyekto ug tabang lakip na ang nagkalin-laing pagbansay-bansay nga aduna nay lakip nga materyales para makasugod og usa ka pangkinabuhian nga pwede kaayo nila mapalambo sa umaabot nga panahon.
Gihangop sad ni CAFC Chairperson Leonard O. Leyros ang kadaghanang miyembro nga hatagan og bili ang RIC Display Center nga naapil sa resolusyon nga gipasa sa CAFC didto sa taas nga panggamhanan ug nagbilin sa usa ka pahinumdom nga importante gayod sa usa ka organisasyon nga magkahiusa ug naay pagsalig sa kaugalingon para magmalahutayon ang grupo.
Si Konsehal Alan Ryann O. Legaspi nipaambit sa usa ka importante nga pahibalo mahitungod sa iyahang tabang nga mao ang paghatag PHP 50,000 nga kantidad sa RIC, kung ang federasyon maka-pasa sa ilahang Project Proposal for a Livelihood taman Desyembre 31, 2022 ug mamahimong ma-implementar sunod tuig 2023. Nagdugang usab sa mensahe si Konsehal Zoltan Dindo D. Dinlayan nga tabangan niya si Konsehal Legaspi nga mangita og dugang tabang-pinansyal para mahatag sa federasyon.
Si Ms. Juanita B. Salvani, usa-ka Researcher, Research Manager kaniadto nga usa na ka Agripreneur in the making karon ang keynote speaker sa maong kalihukan. Naghatag siya ug kadasig sa mga miyembro sa RIC nga dili magduhaduha sa ilahang kaugalingon ug walaon ang kahadlok mahitungod sa pag negosyo, dugang sad niya ang pagpahinumdom sa maong federasyon nga sila dapat makanunayon, mamugnaon ang panghunahuna, maalamon nga trabahante, tigkuha sa risgo, makahimo sa pagpakigsulti ug makapangita og mga oportunidad sa merkado.
Gipahayag usab niya nga ang kababainhan nga agripreneur daghan matagbo nga mga hagit sama sa limitado nga pondo, dili igo nga sistema sa pagsuporta, talagsaon nga balance tali sa pamilya ug negosyo, kakulang sa gikinahanglan nga mga kahanas, pagsagubang sa kahadlok sa kapakyasan ug lisud ng kompetisyon gikan sa lalaki nga negosyante.
Gitapos niya ang iyahang presentasyon sa pagpahinumdom sa mga myembro sa RIC nga sa matag hagit adunay kanunay nga solusyon kinahanglan lang nila nga malaumon, maghunahuna og dako para sa mga nagkalain-laing alternatibo nga solusyon kay ug ang oportunidad dili manuktok sila na mismo ang mag mugna og pultahan, pultahan para sa mga oportunidad nga pwede kaayo nilang mamahimong asset sa pag-negosyo ug mamahimong usa ka rason nga mapalambo pa pag-ayo ang Rural Improvement Club sa dakbayan sa Malaybalay pinaagi sa ilahang mga pagpaningkamot ug kahago.
Human sa paghatag mensahe sa keynote speaker, nisunod na usab ang pagsugod sa nagkalain-laing kompetisyon mao ang Product Display Contest si kinsa ang namahimong una nga mananaog ang RIC Barangay 8, gisundan sa Barangay Kalasungay ug RIC Ornamental Sector isip ika-tulong mananaog.
Alang sa Cooking Contest nga ang pangunang putahe ang Tilapia namahimong una nga mananaog ang RIC Barangay Cabangahan, gisundan sa Barangay Managok ug Barangay 6 isip ika-tulong mananaog.
Sa Dish gardening Contest namahimong una nga mananaog si Ms. Letecia Casas (RIC Ornamental Sector Member), gisundan ni Ms. Virginia Tadlas ug Ms. Rosemar Ayunar isip ika-tulong mananaog nga parehong mga miyembro sa RIC Ornamental Sector.
Alang Christmas Decoration Contest midaog ang Barangay 11, gisundan sa Barangay Kulaman ug ika-tulong mananaog a ng Barangay Bangcud. Natapos ang maong aktibidades sa pagpanghatag ug Certificate of Recognition sa Top 3 RIC Outstanding Barangay’s mao ang Barangay Cabangahan, Kulaman ug Bangcud.
Dugang usab nga Certificate of Recognition ang gihatag sa mga previous RIC Officers CY 2016-2022 pasalamat sa ilahang serbisyo nga gigahin nila sa federasyon ug pagtabang sa pagpalambo niini. Gihatagan usab sa maong ganti ang mga mananaog sa upat nga mga kompetisyon.
Report ni: CHLOE JEAN B. BERONILLA – CagO-NAD