Nagpasiugda ang Malaybalay City Health Office (CHO) og usa ka programa para pagpasidungog sa mga empleyado sa City Health Office labi na kadtong mga barangay health workers (BHWs) sa syudad ug mga BNS o Barangay Nutrition Scholars.

Pinaagi sa maong programa gipasalamatan ang mga health workers sa ilang dedikasyon sa pagserbisyo para masiguro ang kahimsog sa katawhan sa syudad sa Malaybalay.

Gipahigayon ang maong selebrasyon niadtong Desyembre 2, 2022 didto sa Folk Arts Theater, ning syudad nga gipartisiparan sa mga kawani sa CHO, BHWs, BNS ug mga dinapit nga opisyales.

Si Dr. Dennis P. Sangalang, City Health Officer II naghatag sa iyang mensahe pasalamat sa tanan nitambong sa kalihukan.

Ingon man naghatag og mensahe pasalamat ang representante ni Gov. Oneil Roque, nga si Atty. Roque. Iyang gi-aghat ang tanan nga magpadayon sa maayong pagserbisyo sa katawhan kay importante ang kahimsog sa mga lumulupyo sa syudad.

Si Ms Audrey Tan-Zubiri naghatag sa iyang mensahe pinaagi sa “video recording” ug nagpaabot sa iyang panimbaya ug pasalamat sa serbisyo sa mga health workers.

Nitambong usab sa maong kasaulogan ang mga konsehales sa syudad nga sila si Hon. Niko P. Aldeguer, Hon. Brian Nelso T. Flores, Hon. Melchor P. Maramara, Hon. Zoltan Dindo D. Dinlayan, Hon. Kathleen Cecille C. Pagaling, Hon. Cromwell Kiril D. Dinlayan, Hon. Erwin A. Damasco, ug Hon. Royland M. Orquia. Sila nagpadayag sa ilang pagsuporta sa mga health workers ug pagpasalamat sa ilang pagserbisyo labi na taliwala sa hulga sa COVID 19.

Gihatagan usab ug pasidungog ang mga umaabot nga mga “retirees” nga mga health workers. Para dugang pagdasig sa mga health workers naay pa raffle nga gilangkuban 25-kilo bugas, mga sofa bed, flat screen TV, refrigerator, mega box cabinet ug daghan pang uban.

Report: CHO-NADA