Ang buhatan sa City Mayor pinaagi sa CMO – Sports and Development Section mipaabot sa ilang mainitong pagtimbaya sa mga atleta nga giilang mga residente sa Malaybalay human kini nanghakot sa nagkadaiyang medalya atol sa prestihiyosong University Athletic Association of the Philippines (UAAP) competition niadtong Nobyembre 30 hangtud Disyembre 4, 2022 didto sa Metro Manila.

Gipaapot sa mensahe ni Exec. Asst. Atty. Mitchell D. Talatala isip gadala ug gadumala sa CMO – Sports nga dako ang iyang pasalamat sa mga nasangpit nga atleta sa mga pasidungog nga nahatag sa Malaybalay.

Nasayran usab nga ang maong mga atleta garepresenta usab sa ilang tulunghaan nga mao ang University of Sto. Tomas (UST).

Matod pa ni Atty. Talatala, dakong kalipay sa tibuok dakbayan sa ilang nakab-ot sa UAAP tungod kay nakahatag kini og dungog ug garbo kanila, sa ilang pamilya ug mga higala, ingon man sa atoang dakbayan.

Gipadayag ni Talatala kauban ang lokal nga pangagamhanan sa Malaybalay sa pagpanguna ni Mayor Warren Pabillaran nga maningkamot nga mahatagan og pagtagad ug tukmang suporta alang sa mga atleta.

Isip pagdayeg sa ilang nahimo, gipasidunggan sila diha sa buhatan sa Mayor pinaagi sa pagtugyan sa ila og Plaque of Recognition niadtong Enero 10, 2022.

Ang maong mga atleta mao sila si John Paul Araneta nga midaug sa 200 meter dash (silver) ug 4×100 meter relay (silver); Harvey A. Villasan sa 110 meter hurdles (gold), high jump (gold), long jump (silver), 4×400 relay (silver), 400 meter low hurdles (bronze), ug triple jump (bronze); Mejen L. Sumbongan sa decathlon (silver) ug high jump (silver); Roel Hera sa decathlon (5th place); ug Jaymar Guinitaran sa decathlon (4th), 110m hurdle (4th), high jump (5th), ug 400m hurdles (5th)