Sa gipahigayon nga Monday Convocation Program niadtong January 16, 2023 didto sa Peoples Hall, City Hall nga gitambongan sa mga opisyales ug kawani sa lokal nga pangagamhanan sa Malaybalay, gitunol ang mga pasidungog ngadto sa lain-laing personahe sa nagkadaiyang natad.

Kaniadtong January 3, 2023 sa ika 24th Regular Session, giduso ni Councilor Brian Nelson T. Flores nga hatagan ug Plaque of Recognition ang mga mosunod isip garbo sa Malaybalay diin nahimong mananaug sa nagkadaiyang sports nga ilang gipartisiparan mapa-lokal man o international nga mao si: Christine Organiza-Hallasgo nga nakakab-ot sa bulawang medalya sa gipahigayon nga 21-KM International Marathon Event didto sa Ho Chi Minh City, Vietnam kaniadtong Disyembre 11, 2022. Nasungkit usab ni Rosalyn S. Tadlas ang ika-pito nga puwesto sa gipahigayon nga 42-KM sa susamang kompetisyon.

Laing bulawan ug bronze nga medalya usab ang nakab-ot ni Joseff Miguel A. Quirino sa gipahigayon nga Spring Age Category, National Duathlon Championship 2022 didto sa New Clark Pampanga ug Duathlon Sprint Junior Elite didto sa Tagudin Ilocos Sur. Naangkon sab ni Eleora Caelle V. Avanzado ang silver medal sa gipahigayon nga Female Sprint category, 29th NTT Subic Bay International Race (SuBIT), Subic Bay Freeport Zone, Zambales kaniadtong May 2022.

Sa laing bahin, giduso ni Councilor Zoltan Dindo D. Dinlayan nga pagahatagan ug Plaque of Recognition ang duha ka produkto sa Bukidnon State University nga diin residente sa Malaybalay City nga nahimong topnotchers sa gipahigayon nga licensure examination for teachers kaniadtong Oktubre 2022. Nakab-ot ni Ms. GelainS. Litanon ang top 4 nga puwesto sa rating nga 93.80% ug si Ms. Florence S. Baylosis sa top 8 sa Rating nga 93.00%.

Nasayran nga ang pasidungog giduso sa konseho aron kini mamahimong ehemplo, sulundon ug inspirasyon sa mga kabatanonan ug sa umaabot pa nga generasyon.

Report: SP-NADA