Ang seminar sa pagproseso sa karne gilantaw nga maghatag ug dugang nga proyekto nga makamugna og kita para sa mga miyembro sa Rural Improvement Club (RIC) ubos sa sektor sa pagproseso og pagkaon.

Kini nga seminar nagbansay usab sa mga batan-ong agri-preneur sa pagnegosyo pinaagi sa paghimo sa longganiza ug tocino.

Ang aktibidad gipasiugdahan sa Institutional Development Section (IDS) sa City Agriculture Office (CAgO) niadtong Enero 31, 2023 sa Adlai Processing Center sulod sa CAgO Compound. Sila si Ms. Juvelyn L. Revisado ug Ms. Teresita Cadelina maoy mga trainer atol sa seminar.

Adunay 31 ka partisipante ang nitambong sa maong aktibidad nga naglakip sa 10 ka RIC members sa barangay Sumpong ug 21 ka 4H members sa barangay Patpat.

Sa buntag, gisugdan ang programa sa presensya ni Acting Assistant City Agriculturist Engr. Richard B. Leono, Field Operations Division Head Mr. Vic Ian T. Alcontin, CAFC Chairperson Leonard O. Leyros, IDS-OIC Ms. Owen Hazel Q. Lagria, RIC Coordinator Ms. Maridol F. Guinita, 4H Coordinator Ms. Rhea Jean O. Rabago, Gender and Development (GAD) Coordinator Ms. Chesa C. Bautista ug Patpat Agriculture Extension Officer Ms. Marianne Y. Melendez.

Ang hands-on nga pagbansay-bansay sa mga partisipante gi-facilitate kung unsaon pagproseso ang karne nga adunay sagol nga lainlain nga sangkap. Human sa aktibidad nakahimo ang mga partisipante og 41 ka mga pakete sa longganiza na adunay lima ka peraso matag usa ka pakete og 41 pud ka pakete sa tocino nga ilang gisugdan og baligya.

Ang seminar naghatag kanila ug start-up capital nga mokabat sa Php 22,000.00. Hatagan usab sila og dugang meat grinder aron makasugod na sila sa pagnegosyo sa Longganiza, Chorizo, ug Tocino Processing isip dugang panginabuhian.

By: GECEL Q. OCON, CAgO-NADA