Ang Departamento sa Agrikultura sa Rehiyon X sa padayon nga katuyoan niini nga madugangan ang produksiyon sa pagkaon sa nasud naghatag suporta sa mga mag-uuma sa humay. Ang Republic Act No. 11203, o ang Rice Tariffication Law (RTL), naglatid nga ang sobra nga kita sa taripa kinahanglang gamiton sa pagtabang sa mga Pilipinong mag-uuma sa humay, sa ingon gipaila ang Rice Farmers Financial Assistance (RFFA).

Ang pinansyal nga tabang gihatag ngadto sa mga kuwalipikadong mag-uuma sa humay diri sa syudad sa Malaybalay isip bayad sa gipaabot nga pagkunhod o pagkawala sa kita sa umahan gikan sa taripa tungod sa mga restriksyon sa importasyon.

Ang programa gipalig-on pa pinaagi sa pagpatuman sa Republic Act No. 11598 o ang “Cash Assistance for Filipino Farmers” niadtong Disyembre 2021. Gimandoan niini ang Departamento sa Agrikultura sa paghatag og salapi, sa kantidad nga P5,000.00, kada mag-uuma sa humay nga naay duha ka ektarya paubos pa na basakan.

Uban sa suporta sa Lokal na Pangagamhanan sa Malaybalay pinaagi sa City Agriculture Office (CAgO) ug Landbank of the Philippines, ang RFFA 2 giapod-apod niadtong Sabado, Marso 4, 2023 sa San Jose Covered Court. Kinatibuk-ang kantidad nga Php 9,240,000.00 para sa 1,848 ka mag-uuma nakadawat ug cash card nga adunay sulod nga Php 5,000.00 matag mag-uuma.

Si Mayor Jay Warren R. Pabillaran nitambong sa maong aktibidad. Nalipay siya nga bisan pa sa kadaghan sa mga mag-uuma nga kinahanglan hatagan, maayo ang pagkahan-ay sa kalihokan.

Sumala pa ni City Agriculturist Remedios R. Sarzuelo nga ang Lokal na Pangagamhanan pinaagi kang Mayor Pabillaran nagahin usab og Php 42,134,850.00 nga kantidad nga naglangkob sa mga sinako sa mais ug abono para sa 4,761 ka mga mag-uuma sa mais nga ipang-apod-apod sa Marso 20, 21, 23 ug 24, 2023.

Samtang si Field Operations Division Chief Vic Ian T. Alcontin nagpasalamat sa mga Agriculture Extension Officers (AEOs) nga lumilihok sa barangay og mga personahe sa Landbank – Malaybalay Branch na gidumalaan ni Ms. Madeline Rodriguez nga maoy nagpadali sa pagpang-apod-apod.

Giawhag ang mga mag-uuma nga magpa-enrol sa Registry System for Basic Sectors in Agriculture (RSBSA) aron makabaton sila sa mga programa, proyekto, ug aktibidad sa agrikultura. Ang Departamento sa Agrikultura, kauban ang City Agriculture Office, magpadayon ug proseso sa mga nagparehistro sa RSBSA.

Ni: Gecel Quinquiño-Ocon, CAgO-NADA