Laing centenarian sa Barangay Manalog na usab ang nidawat sa ganting salapi balor og Php 100,000.00 isip “Centenarian Gift” gikan sa Department of Social Welfare and Development Region 10 (DSWD-10) niadtong Abril 23, 2024.

Si Mrs. Porfita Sario Libanda, 102 anyos, gipanganak niadtong Nobyembre 4, 1921 ug nahimong kwalipikado human ma-review ug ma-aprobar ang mga rekisitos nga gisumite pinaagi sa tabang sa iyang anak ngadto sa DSWD-10.

Kini pinasubay sa Republic Act 10868 o Centenarian Act of 2016 kinsa nag ila ug nag hatag ug pasidungog ngadto sa mga Pilipino nga modangat sa pangidaron nga 100 years old nga ania nanimuyo sa Pilipinas o kaha gawas sa nasud. Kini usab regalo-pasidungog tungod sa hataas nga kinabuhi.

Dako ang pasalamat sa pamilya ni Libanda sa nadawat nga regalo gikan sa gobyerno nga personal nga gihatud ug gipresentar mismo sa ilang panimalay.

Kahinumdoman nga usa ka centenarian sa Barangay Manalog usab ang nakadawat sa susamang pasidungog kang Mrs. Yaga Sarino Molhay niadtong Agosto 8, 2023.

Report: CSWDO-NADA