Ang lokal nga pangagamhanan sa Malaybalay pinaagi sa City Mayor’s Office-Agricultural and Biosystems Engineering Division (CMO-ABED) nagpahigayon og turnover ceremony para sa 1-unit paddy hauler niadtong Marso 9, 2023 didto sa Purok 5, Brgy. San Martin, Malaybalay City.

Kini na proyekto nagkantidad og Php 700,000.00 gikan sa 20% City Development Fund sa syudad sa Malaybalay. Ang San Martin North Main Canal Irrigator’s Association mao ang benepisaryo sa nasangpit nga makinarya.

Sumala pa sa CMO-ABED, ang  bag-ong ekwipo makaabag sa paghakot sa mga naharvest nga palay gikan sa basakan ug dili magkompetensya sa naandan na pamaagi kung diin kabayo ang gagamiton sa pagpanghakot. Dugang pa, makahatag kini kapilian sa mag-uuma sa ilang gusto na pamaagi sa episyente nga paghakot sa ilang palay.

Nitambong si Mayor Jay Warren R. Pabillaran sa maong aktibidad. Sa iyang mensahe, iyang gi-congratulate ang asosasyon ug nanghinaot nga ang proyekto nga ilang nadawat makatampo sa pag-uswag alang sa tanan miyembro sa ilang pagpanguma.

Ingon man, naghatag pud sa iyang mensahe si Punong Barangay Sergio C. Fiel ug  Brgy. Kagawad Librado Patoc sa Brgy. San Martin agi ug pagpasalamat sa mga proyekto nga nadawat ug kalambuan nga natagamtaman sa Barangay.

Ang San Martin North Main Canal Irrigator’s Association pinaagi sa ilang presidente, Mr. Fernando F. Tubale, nagpasalamat kang Mayor Pabillaran ug sa lokal nga pangagamhanan sa makinarya nga nadawat ug nisaad na ampingan ug abagahon ang pag-ayo ug pagmentinar niini aron mapuslan sa taas nga panahon.

Sa susamang adlaw, ang Malaybalay City Federation of Irrigator’s Association, Inc. nagpahigayon sa ilang 1st quarter meeting. Gilangkuban kini sa mga representante gikan sa CMO-ABED, National Irrigation Administration (NIA), Philippine Crop Insurance Corporation (PCIC) ug National Food Authority (NFA).

Nahisgutan sa maong panagtigum ang mga update sa ilang mga programa, proyekto ug kalihokan ug gitubag ang mga pangutana sa mga presidente sa irrigator’s association. Si Mayor Pabillaran naminaw ug mitubag usab sa mga pangutana, mulo ug hangyo sa mga partisipante.

Report ni: Engr. Ezeddin D. Orambon, CMO-ABED NADA