Basihanan sa tanan nga mga plano sa usa ka lokal nga pangagamhanan, ang Comprehensive Land Use Plan kon CLUP ug alang sa dakbayan sa Malaybalay, gisugdan na kini sa pag-update sa City Planning and Development Office (CPDO). Ang maong pag-usab o pag update gihimo sa panagtimbayayong sa CPDO ug sa Department of Human Settlement and Urban Development kon DHSUD.

Tungod niini, pipila ka mga staff sa CPDO nga gipanguluhan ni Engr. Adrian R. Gamboa, City Planning & Development Coordinator ang miadto sa DHSUD niadtong Enero 18, 2024 ug nahisgutan ang mga kalihukan ug mga pakisayran o references sa maong updating.

Ang gimando nga pagmugna sa CLUP usa ka pamaagi sa pagdumala sa lokal nga mga teritoryo kun diin mahibaloan ang mga nagkalain-laing pag gamit sa yuta. Dugang pa niini, mahibalo-an ang mga angay nga lakang sa pag-implementar sa mga proyekto o kalihukan sa syudad o sa munisipyo. Makita usab sa maong dokumento ang mga lugar kun diin itugot o ginadili ang pag-implementar sa mga proyekto.

Ang maong updating naglangkob sa upat ka modules nga mahimong basihan sa nagkalain-laing kalihukan nga panguluhan sa CPDO ug DHSUD. Gibasi sa Memorandum of Agreement tali sa Lokal nga Pangagamhanan sa Malaybalay ug sa DHSUD ang pag-usab o pag-update sa CLUP sa Dakbayan sa Malaybalay, ug kini adunay gitagana nga usa ka tuig ug unom ka bulan nga panahon nga kini mahuman.

Ni: Atty. Kristina Egnar – Blaza/ CPDO NADA Coordinator