Ang lokal nga pangagamhanan sa Malaybalay nagpasiugda ug pagpang-bakuna sa booster shots sa mga frontliners ug empleyado aron madasig na usab ang kampanya sa gobyerno nga protektahan ang katawhan sa Covid-19.

Sa pagpanguna sa City Health Office ug katimbayayong ang Department of Health, gisugdan ang kalihokan sa buntag sa Agosto 1, 2022 diha sa Peoples’ Hall, City Hall, kauban ang suporta gikan sa department heads, men-in-uniform, ug mga punong barangay.

Dako ang pasalamat ni Mayor Jay Warren R. Pabillaran sa iyang mensahe alang sa mga frontliners nga maoy gasagubang sulod na sa duha ka tuig. Giduso sa maong aktibidad nga ang “empleyado dapat bakunado kumpleto with booster dose para todo protektado sa pagserbisyo sa mga Pilipino.”

Giawhag ni Mayor Pabillaran ang katawhan sa Malaybalay nga magpabakuna na aron mabalik nata sa normal aron makabangon sa hinayhinay ang atong ekonomiya. “Atong ibalik ang kadasig sa pagpang-bakuna ug kini magsugod sa atong opisina; let us be a responsible citizens sa syudad sa Malaybalay, magpabakuna na ta,” matod niya.

Gidasig usab ang empleyado nga wala pa sukad nakadawat sa ilang first dose.

Sumala pa sa City Health Office, gilauman nga usa kini ka milestone sa syudad ug sa tibuok nasud nga matabangan nato ang gobyerno sa kaulohan nga maangkon sulod sa 100 days nga 90 porsyento na sa senior citizens, ug 50 porsyento sa booster jabs ang makab-ot alang sa general population.

Nasayran nga gipaningkamotan aron moabot ang panahon nga safe na ang pagpulas sa face mask ug sa hinayhinay mawala na ang mando niini; malimitahan na ang pag-gamit sa alert level system aron makabalik na sa normal hilabi na ang atong ekonomiya; ug full protection sa atong kabataan alang usab sa pag-implementar sa face-to-face classes.