Sa usa ka mahinungdanong panghitabo alang sa ekonomikanhong kalamboan, ang City Trading Post Facility opisyal nga gitugyan sa Department of Agriculture Region X (DA-10) ngadto sa Lokal nga Pangagamhanan sa Malaybalay niadtong Enero 17, 2024 sa Malaybalay City Public Market.

Ang kinatibuk-ang gasto sa nasangpit nga proyekto mikabat sa Php 9,600,000.00 nga gilangkuban sa DA-Kadiwa Grant nga Php 5,000,000.00 ug Local Government Unit (LGU) equity nga Php 4,600,000.00 para sa land area nga 1,000 sq.m.

Ang pagtukod sa Trading Post nagtumong sa paghatag ug desente, limpyo, ug organisado nga lugar alang sa mga kalihokan sa pagnegosyo sa mga lokal nga produkto gikan sa mga lokal nga mag-uuma ug negosyante sa Syudad sa Malaybalay aron ipakita ang ilang mga produkto ug aron masiguro ang pagtaas sa kita.

Nagsugod ang aktibidad pinaagi sa pagbukas sa marker ug ribbon cutting isip simbolo sa inagurasyon sa bag-ong pasilidad. Ang pagbendisyon sa nasangpit nga pasilidad gipahigayon dayon ni Fr. Arnulfo Paña.

Gitambongan kini ni Dir. Carlota S. Madriaga, Regional Technical Director for Operations sa DA Region X; Dr. Janeth D. Lopez, Provincial Operations Center (POC) Head; Engr. Alden Tapio sa Regional Agricultural Engineering Division (RAED); Ms. Helen M. Roldan, Agriculturist II sa DA Agribusiness and Marketing Assistance Division (AMAD); Mayor Jay Warren R. Pabillaran; Bise Mayor Estelito R. Marabe; Mga Konsehal nga sila Alan Ryan O. Legaspi, Niko P. Aldeguer, Brian Nelson T. Flores, Zoltan Dindo D. Dinlayan, Kathleen Cecille C. Pagaling, Cromwell Kiril D. Dinlayan, Erwin A. Damasco, Christopher B. Soria, ug Christopher Lambert N. Tortola.

Anaa usab nagtambong sila kanhi City Agriculturist Remedios R. Sarzuelo, Engr. Richard B. Leono – CAgO OIC, Mr. Romeo R. Lapeciros, Jr. – CEEDMO Designate, ug uban pang mga department heads, Barangay Chairman Dexter P. Gamo, City Agriculture and Fisheries Council (CAFC) Chairperson Leonard O. Leyros ug labaw sa tanan ang mga asosasyon sa mga mag-uuma nga benepisyaryo sa proyekto.

Mitambong usab ang mga personahe sa City Agriculture Office ug City Economic Enterprise Development and Management aron ipakita ang ilang suporta.

Ang Ceremonial Tun-over of the Key of Responsibility gipatuman human sa presentasyon sa Overview sa Proyekto nga gihatag ni Engr. Leono, diin iyang gipatin-aw ang mga katuyoan, mga benepisyaryo, sistema sa negosyo, ug mga aspeto sa pagpamaligya sa Trading Post.

Atol sa programa, si Dir. Madriaga mipadayag sa iyang kalipay nga ang Trading Post nahimutang sa usa ka estratehikong lokasyon sulod sa merkado, diin ang mga mag-uuma direktang maka-access. Siya midugang nga ang Malaybalay City Trading Post sama sa bagsakan sa Benguet, apan sa gamay nga bersyon.

Giawhag usab niya ang mga tigpaminaw sa pagpraktis sa Value Chain Approach nga dili lang motutok sa produksiyon, apan lakip na sa pagproseso ug pagpamaligya sa mga produkto mao nga iyang giawhag ang mga mag-uuma sa pag-clustering aron makapahimulos sa dagkong mga proyekto.

Dugang pa, iyang gipasiugda nga ang DA Region X nagpasiugda sa 3 Cs, nga mao ang pag-converge, pag-coordinate, ug pag-cooperate. Dayon iyang nalakbit ang City Government of Malaybalay sa malampusong pagturn-over sa Dairy Processing Plant sa Barangay Dalwangan nga puro nahitabo sa pamunoan ni Mayor Pabillaran.

Si Konsehal Legaspi sa iyang mensahe nipadayag sa iyang pagpasalamat nga napatuman na gyud ang Trading Post tungod kay kini nga tubag sa mga problema sa mga mag-uuma nga walay merkado sa ilang mga produkto. Naghatag siya og ehemplo pinaagi sa mga mag-uuma sa kamatis sa Barangay Patpat nga nadaot ang produkto niadtong 2022 tungod sa sobra nga suplay. Busa, dako ang iyang pasalamat sa suporta sa DA RFO X ug sa LGU.

Si Mayor Pabillaran sa iyang pakigpulong, nipadayag usab og pasalamat sa tanang nalambigit sa pagpalampos sa proyekto. Gipahinumdoman niya ang mga nakadawat nga magpadayon sa pagtrabaho tungod kay ang negosyo dili libre nga sakay. Iyang gihagit ang mga benepisyaryo nga dili moundang sa panahon sa kapakyasan ug magpadayon sa pagpauswag sa ilang kaayohan.

Si Bise Mayor Marabe nihatag ug gibug-aton sa tumong sa proyekto nga mao ang pagtabang sa matag mamaligyaay sa merkado tungod kay kini usa ka “symbiotic area” diin ang tanan nagkinahanglan sa tanan. Iya usab nga gipahinumdoman nga ang mapildi mao ang magtinapolan ug gusto og mga shortcut mao nga iyang gidasig sila sa pagpadayon.

Si CEEDMO Designate Lapeciros nipadayag nga gidawat na nila ang hagit sa pagdumala sa pasilidad ug gipahibalo nga andam na ang mga guidelines. Iya dayong gipaambit nga sama sa DA RFO X nga adunay 3Cs, ang CEEDMO aduna usab 3Ks nga nagpasabot ug “Kalimpyo, Kahapsay, ug Kabibo”.

Si Mr. Edwin Catalla nga usa ka mag-uuma sa patatas sa Barangay Imbayao ug Ms. Merlyn Gallardo nga usa ka mag-uuma sa kamatis sa Barangay Patpat nitubag sa pasalamat ngadto sa LGU Malaybalay ug DA RFO X sa pagtabang kanila sa ilang paningkamot. Kabahin sila sa walo (😎 ka asosasyon nga giila nga benepisyaryo sa trading post.

Sa pag-abli sa mga pultahan sa City Trading Post ngadto sa publiko, taas ang pagpaabot sa mga positibong kausaban nga madala niini sa komunidad. Uban ang pagtutok sa pagpadayon, pagka-inklusibo, ug pag-uswag sa ekonomiya, ang pasilidad nagbarug isip usa ka masanag nga panig-ingnan nga kung unsa ang makab-ot, pinaagi kini sa pagtinabangay nga mga paningkamot ug pagplano para sa umaabot.

Ni: Gecel Q. Ocon, City Agri-NADA