Gipasiugdahan sa City Mayor’s Office ang convocation program ubos sa lokal nga pangagamhanan sa Malaybalay nga nagdala sa tema: “Unrelenting Public Service in this Holiday Season,” sa buntag sa Desyembre 12, 2022 diha sa People’s, City Hall.

Sa mensahe ni Mayor Jay Warren R. Pabillaran, iyang gipasalamatan ang tagsa-tagsa nga paningkamot ug dedikasyon sa mga kawani nga nahimong nagmalampuson sa ilang buluhaton sa tumong nga epektibo ug episyente ang pag-alagad sa katawhan.

Dugang pa niya, tungod sa atong wala’y puas nga pagpatuman sa programa, proyekto ug kalihokan sa lokal nga pangagamhanan sukad pa sa mga milabay’ng mga katuigan naangkon nato ang nagkadaiyang pasidungog gikan sa kaulohan.

Pipila niini giila ang Malaybalay isip awardee sa Seal of Good Local Governance (SGLG), Child-Friendly City, ug usa ka consistent Sandugo awardee.

Gipanghinaut ni Mayor Pabillaran nga magpadayon sa maayong pagserbisyo ug suporta sa nagkadaiyang programa sa gobyerno diin iyang gihagit ang mga empleyado sa pagmakugi sa mga bulohatan basi sa tahas nga gihatag.

“Sa paglambo nabiyaan na kita sa atong mga silingan nga nasud busa angay lang nga ipadayon nato atong nasugdan aron aduna kita’y kontribusyon sa kalambuan sa atong syudad ug sa probinsya sa Bukidnon,” matod pa niya.

Sa ulahing bahin sa programa, gipresenta ni City Administrator, Atty. Anna Marie R. Bergado ang bag-ohay pa lamang nga award gikan sa National Disaster Risk Reduction and Management Council – Kalasag committe nga gitugyan sa syudad mao ang Gawad Kalasag Seal of Exellence.

Sa maong citation giila ang Malaybalay isip “fully compliant on the standards for the establishment and functionality of the Local Disaster Risk Reduction and Management Council and Office (LDRRMCO) for calendar year 2022 as prescribed in the Philippine Disaster Risk Reduction Management Act of 2010 or the Republic Act No. 10121.”