Ang City Government sa Malaybalay, uban sa kooperasyon sa Department of Labor and Employment (DOLE) Bukidnon, nag-organisar og usa ka malampuson nga Local ug Overseas Job Fair didto sa People’s Hall, New City Hall, Casisang, Malaybalay City niadtong Setyembre 4, 2023.

Kini nga kalihokan, gipahigayon pinaagi sa Public Employment Service Office (PESO), nagtipon og labaw sa 20 ka lokal nga mga kompanya ug lima ka mga overseas nga ahensya, nga naghatag oportunidad sa kapin 3,000 ka mga bakanteng trabaho.

Makita nga positibo ang tugon gikan sa mga naghandom og trabaho, diin moabot sa 440 ang mga nagparehistro ug 120 kanila ang “Hired On The Spot” (HOTS), nga nakakuha og daliang oportunidad sa trabaho.

Nag-apil usab sa kalihokan ang mga ahensya sa gobyerno sama sa Philippine Statistics Authority (PSA) ug National Bureau of Investigation (NBI), nga naghatag og importante nga mga serbisyo sama sa pagproseso sa issuance sa SECPA nga birth, death, CENOMAR, marriage certificates, ug NBI clearances.

Si City Administrator ug PESO Manager, Atty. Anna Marie R. Bergado, miklaro sa kaimportante sa panarbaho, labi na alang sa mga bag-ong graduwado, mga indibidwal nga nawad-an og trabaho tungod sa pandemya, ug kadtong walay panginabuhian tungod sa kawad-on. Gipasalamatan niya ang mga nagkadaiyang mga kompanya nga mihatag oportunidad sa mga gahandom pangita og trabaho.

Si Mr. Raul L. Valmores, DOLE Provincial Director, mipatin-aw sa paningkamot sa DOLE sa pagtinabangay uban sa mga PESO sa tibuok Bukidnon aron matugunan ang gap tali sa mga naghandom og trabaho ug mga kompanya pinaagi sa mga gipahigayong mga Job Fairs.

Ang PESO padayon nga mo implementar sa mga programa nga magsilbi og dakong tabang sa pagpataas sa employment rate sa dakbayan, diin makahatag og parehong kaayuhan sa mga nangita og trabaho ug mga kompanya.

Report: PESO Malaybaly-NADA