Ang Malaybalay City subling nagpakita sa iyang mga produkto sa agrikultura uban sa nagkalain-laing mga munisipyo sa Probinsya sa Bukidnon atol sa tinuig nga Agri-Fair Kompetisyon isip kabahin sa Kaamulan Festival.

Ang nasangpit nga kalihukan maoy usa sa labing gipaabot nga panghitabo sa probinsiya, nga nagdani sa mga lokal ug turista nga mosaksi sa mabulukon nga mga aktibidad ug ilakip ang ilang kaugalingon sa adunahang kultural nga kabilin sa mga lumad sa Bukidnon. Kini nga kalihokan naghatag higayon sa mga lokal nga agri-preneur nga magpakita sa ilang mga produkto sa agrikultura aron ibaligya.

Niadtong Marso 23, 2024, opisyal nga gibuksan ang Agri-fair uban sa koordinasyon sa City Agriculture Office nga gipangulohan ni Engr. Richard B. Leono. Ang pagbukas nga programa gitambongan ni Konsehal Alan Ryan O. Legaspi kinsa miila sa partisipasyon sa Malaybalay City Agri-preneurs Association ug nagdasig sa mga tigpaminaw sa pagsuporta sa mga lokal nga produkto.

Lakip sa mga produkto nga gipakita sa Agri-booth sa Malaybalay City mao ang presko nga mga utanon sama sa lettuce, kamatis, talong, cauliflower, broccoli, baguio beans, ug spring onions. Gibaligya usab ang mga processed products sa lain-laing agripreneur sama sa banana chips, banana loaf, black rice, jams, salad mix, purple corn coffee, monk’s blend coffee, mushroom chicharon, wine, chocolate, herbs tea, honey, ug daghan pa.

Pinaagi sa pagsuporta sa atong mga lokal nga produkto, makab-ot nato ang pag-uswag nga gusto natong makab-ot sama sa gilantaw sa siyudad nga adunay malamboon nga agri-eco tourism nga nasulat sa tagline niini diin makita sa agri-booth ang “SAKA TA MALAYBALAY!”

By: Gecel Quinquiño-Ocon, City Agri-NADA