Ang mais gikonsiderar nga ikaduhang tanom sunod sa humay sa Siyudad sa Malaybalay. Ang Departamento sa Agrikultura sa Rehiyon X ug ang Lokal nga Pangagamhanan sa Malaybalay nagtinguha nga madugangan usab ang produksiyon sa kalidad nga mais alang sa konsumo sa tawo, pagkaon sa hayop ug gamit sa industriya, ingon man paghatag og kalamboan sa mga mag-uuma pinaagi sa pagdugang sa ilahang kita.

Tungod niini, ang LGU Malaybalay nga gipangulohan ni Mayor Jay Warren R. Pabillaran nagsugod sa pag-apod-apod sa 4,761 ka sako nga Dekalb Corn Seeds (hybrid) ug usab 4,761 ka sako sa Complete Fertilizers nga nagkantidad ug Php 42,134,850.00, nga giapod-apod sa matag usa ka mag-uuma sa mais niadtong Abril 2023.

Dugang sa inisyatibo sa LGU nga maghatag ug inputs alang sa mga mag-uuma sa mais. Ang Department of Agriculture Regional Field Office 10, pinaagi sa City Agriculture Office nga gipangulohan ni OIC Engr. Richard B. Leono, nag-apod-apod usab og dugang nga 1,000 ka sako sa Dekalb na mais (9 ka kilo matag sako) nga gidugangan sa 1,000 ka sako nga kompletong abono (50 kgs/bag) sa Siyudad, nga nagsugod niadtong Hulyo 17, 2023. Nagkantidad kini ug Php 8,850,000.00.

Ang mag-uuma-benepisyaryo kinahanglang rehistrado sa Registry System for Basic Sectors in Agriculture (RSBSA) ug adunay produksiyon sa mais nga 0.50 ektarya o mas lapad pa, mas maayo nga miyembro sa aktibong corn cluster organization, ug angayan usab nga makadawat sa maong suporta.

Sa pagkakaron, ang mga sinako sa binhi sa mais ug abono nga gihatag sa DA-RFO X nagpadayon pa nga giapod-apod sa lainlaing mga barangay sa dakbayan.

Report: GECEL Q. OCON, City-Agri NADA