Nagmalampusong gipahigayon ang Oath-taking ceremony alang sa mga opisyales sa lokal nga pangagamhanan sa Malaybalay niadtong Hunyo 29, 2022 diha sa Folk Arts Theatre, Malaybalay City.

Nanumpa ang mga bag-ong napili nga mga opisyales sa Syudad nga gipangunahan ni Mayor Jay Warren R. Pabillaran atubangan sa mga opisyales sa kabarangayan, nagkadaiyang kawani sa gobyerno, ug pipila ka dinapit nga bisita.

Kompleto usab ang hanay sa konseho nga gipangulohan ni Vice Mayor Estelito R. Marabe ug ang presensya sa mga konsehal nga sila si Hon. Niko P. Aldeguer, Hon. Brian Nelson T. Flores, Hon. Melchor P. Maramara, Hon. Zoltan Dindo D. Dinlayan, Hon. Kathleen Cecille C. Pagaling, Hon. Cromwell Kiril D. Dinlayan, Hon. Erwin A. Damasco, Hon. Royland M. Orquia, Hon. Christopher B. Soria, ug Hon. Allan Ryann Legaspi uban sa ilang tagsa tagsa ka mga pamilya.

Si Mayor Pabillaran kinasing-kasing nga mipadayag sa iyang emosyonal ug maundanon nga inaugural speech para sa katawhan sa Malaybalay nga ang tinuoray nga gugma sa katawhan – walay pili, ma-pobre man o madato.

Iyang gibutyag ang dako nga pagpasalamat sa katawhan sa Malaybalay og kini iyang pulihan sa serbisyo nga iyang ikahatag. “Karong adlawa timaan sa akong pagpasalamat, akong ihatag akong panahon, plano, kusog ug kinabuhi alang kaninyo,” siya nag-ingon taliwala sa hagit sa panahon.

Si Mayor Pabillaran nagkanayon nga responsibilidad sa mga napiling opisyales ang gihandum sa katawhan nga mahatagan sa tiunay nga serbisyo nga wala’y pili. “Kaning mga tao nga anaa diri karon, katong naa sa Mercado, naa sa uma, nanay ug tatay sa balay, mga kabatan-onan, mga katigulangan, naas kabukiran, mga lumad natong igsuon, mga negosyante – sila ang rason ngano nausab ang among kapalaran. Gitagaan ta og katungdanan kung asa kita nahimutang karon, kinsa mi karon, ug nganong naa mi diri karon kay tungod ug alang sa katawhan sa Malaybalay.”

“Ako usa lamang ka instrumento. Sama kanako, instrumento kitang tanan ug kung mobaton kitang tanan diha sa panaghiusa ug panag-uyon, makamugna kita sa labing nindot nga orkestra sa siyudad sa Malaybalay. Uban ta tanan para sa kalampusan,” dugang pa niya.