Aprobado na sa Sangguniang Panlungsod sa syudad sa Malaybalay ang Resolution No. 2023-0248 nga mao ang paglugway sa adlaw nga gitakda alang sa pag proseso sa motorela permit hangtod sa Marso 30, 2023 nga walay multa.

Mahibaloan nga niadtong Enero 26, 2023, ang buhatan ni City Mayor Jay Warren R. Pabillaran, nag endorso ngadto sa Sangguniang Panlungsod sa sulat gikan sa Malaybalay City Federation of United Motorela Operators and Drivers Association (MACFUMODA), Inc. nga naghangyo sa paglugway sa adlaw nga gitakda alang sa pag proseso sa motorela permit.

Human sa masusing pagtuon, ang Committee on Transportation, Communication and Traffic Management, Business Permit and Licensing Division ug City Legal Office nag rekomenda nga pagatugotan ang maong hangyo sa MACFUMODA hangtod Marso 30, 2023 nga walay multa ug ang resolusyon niini giduso ni Hon. Niko P. Aldeguer kinsa mao ang Chairman sa maong komitiba ug kini hiniusang nauyonan sa konseho niadtong Pebrero 14, 2023 atol sa ika-30 nga regular session.

Tungod niini, mahatagan pa ug panahon ang mga motorela operators sa pagpangandam ug pag proseso sa mga kinahanglanon alang sa ilang mga motorela permit.

Report: SP-NADA