Atol sa gipahigayon nga 2nd Monday Convocation Program sa lokal nga pangagamhanan sa Malaybalay kaganinang buntag Pebrero 13, 2023, nga gitambongan sa mga opisyales, mga kawani ug mga dinapit nga bisita, gitunol ang pasidungog ngadto kang Jamber Alexis Jacutin Idulsa diin siya nahimong delegado sa 32nd Asia-Pacific Scout Jamboree ug myembro sa Association’s of the Top Achiever Scout (ATAS).

Mahibaloan nga niadtong Enero 31, 2023 atol sa ika 28 na regular session sa Sangguniang Panlungsod, giduso ni Councilor Alan Ryann O. Legaspi nga hatagan ug pasidungog si Idulsa isip

delegado sa nasangpit nga panagtigum nga gipahigayon didto sa Bangladesh.

Nasayran nga nakab-ot usab ni Idulsa ang mosunod nga award sa nagkadaiyang natad: Eagle Scout Award National Level, Regional Scout Representative for Mindanao, National Lead Convener, Outstanding ICON for Youth Leadership ug National Winner sa Ten Outstanding Boy Scouts of the Philippines.

Angay ug takos lamang ang pasidungog nga gihatag ngadto kang Idulsa sa iyang talagsaon nga buhat diin naghatag kinig dungog ug garbo dili lamang sa Malaybalay kon dili sa tibook Pilipinas. Mamahimo kining sulundon ug ehemplo sa mga kabataan ug sa umaabot pa nga generasyon.

Report: SP-NADA