Ang Public Employment Service Office (PESO) sa Malaybalay City gipasidunggan alang sa ilang outstanding nga performance sa employment facilitation nga giila sa Department of Labor and Employment Region 10 (DOLE-X). Ang recognition gihatag atol sa 2023 Regional DOLE-X ug PESO Year-End Performance Assessment (YEPA) nga gipahigayon niadtong Pebrero 15-16, 2024, sa Chali Resort and Conference Center sa Cagayan de Oro City.

Ang PESO Malaybalay City nakadawat og duha ka inila nga awards atol sa maong event. Una, ilang gihatagan og Special Citation alang sa ilang epektibong implementasyon sa National Skills Registration Program – Public Employment Information System (NSRP-PEIS) sa Component City Category. Kini nga award nagpaila sa ilang kalamposan nga adunay highest number of applicants nga narehistro ilalom niini nga programa.

Ikaduha, gipasidunggan ang PESO Malaybalay City og Plaque of Recognition alang sa pagkab-ot sa 100% Performance Rating sa implementasyon sa core employment facilitation services ug other vital programs. Ang award gipresentar ngadto sa Local Chief Executive, Hon. Jay Warren R. Pabillaran, ug PESO Manager, Atty. Anna Marie R. Bergado.

Ang maong mga awards gidawat ni Malaybalay City PESO Manager, Atty. Anna Marie R. Bergado inubanan sa DOLE Bukidnon Provincial Director, Mr. Raul L. Valmores. Ang maong event gipangulohan ug gipahigayon sa DOLE Region 10, ubos sa liderato ni Regional Director, Atty. Erwin N. Aquino.

Kini nga recognition nagsilbi nga inspirasyon alang sa PESO Malaybalay City aron ipadayon ang ilang maayo nga serbisyo sa pagtabang sa mga nangita og trabaho lakip na sa mga employers. Kini usab pagpamatuod sa ilang dedikasyon sa paghatag og kalidad nga serbisyo sa pagpanarbaho ngadto sa komunidad.

Ang kalamposan sa PESO Malaybalay City dili mahimo kung wala ang paningkamot ug commitment sa mga empleyado, lakip na ang suporta sa mga beneficiaries sa Government Internship Program (GIP) ug ang padayong suporta sa Local Government sa Malaybalay.
Ang PESO Malaybalay City nagpabiling committed sa iyang misyon sa pagpromotar og mga oportunidad sa trabaho ug sa pagtabang sa job placements alang sa mga lumolupyo sa Malaybalay City.

Report: PESO Malaybalay City – NADA